Күлүк

Светлана, Дьокуускай куорат олохтооҕо:

– Аҕам өттүнэн эбэм эдэр сааһыгар огдообо хаалан, эһэбит суох буолуоҕуттан соҕотох олорбута. Оҕолоро, сиэннэрэ хам-түм ыалдьыттыы тиийэрбит.

Эбэбит уруккуттан да сүрэҕэ мөлтөх этэ, аны кэнники кэмҥэ түөһэйэн хаалбыта. Дьиэтиттэн атын сиргэ көһөрүттэн кыккыраччы аккаастаммыта, онон үс оҕото солбуйса сылдьан көрбүттэрэ. Ийэлэрэ күнү-түүнү араарбата, түүннэри хаамыталыыра, сороҕор утуйа сыппыт дьону улаханнык соһутара: уһуктан кэллэхтэринэ тобулу көрөн турар буолар үһү. Аны кыра уола хоһун аанын хатаннаҕына, дибдийэн, ардыгар ыһыытаан туран астарар эбит.

Эбэбит хаста даҕаны балыыһаҕа киирэ сылдьыбыта. Эмтэнэн тахсарыгар бэттэх кэлэр, син дьону билэр, уруккутун курдук күлэр-үөрэр, бэл, төлөпүөнүнэн кэпсэтэр этэ.

Биэс сыллааҕыта эбэбит ковидтаан баран өрүттүбэккэ, олохтон туораабыта. Аҕам үлэтинэн атын улууска барбыт буолан, бэһис күнүгэр кистээбиппит. Тиһэх суолугар атаарыы этэҥҥэ ааспыта, онтон 40 хонугар бэлэмнэнэ сырыттахпытына, биир дьикти түгэн буолбута...

Эргэ дьиэ күүлэтигэр саҥаспыт алаадьылыы, оттон биһиги кус үргүү, собо үөстүү олорбуппут. Убайбыт кыыһа, ол саҕана устудьуон, эмискэ ойон туран: «Селфилыахха», – диэччи буолбута. Бары үөрэ-көтө түспүппүт.

Бүтэн баран хаартыскабытын көрбүппүт, арай убайбыт кыыһын кэннигэр түннүккэ күөх көстүүмнээх дьахтар күлүгэ турара. Эбэбитин тиһэх суолугар оруобуна оннук таҥыннаран ыыппыппыт. Дьэ, дьикти! Аны ол күлүк түөрт хаартыскаҕа барытыгар баара!  

Аҕыйах хонугунан ол хаартыскаларбыт харааран хаалбыттара. Убайбыт кыыһа куттанан, сотторон кэбиспит этэ. Бары да олус куттаммыппыт. Хата, билигин этэҥҥэбит, убайбыт кыыһа үөрэҕин бүтэрбитэ, утуу-субуу икки оҕолонон олорор.