Көхтөөх сынньалаҥы уонна спорду таптааччылары сэргэх өрөбүллэр күүтэллэр

202-с түөлбэҕэ мууһунан сүүрүү

Сарсын, кулун тутар 28 күнүгэр, 202-с түөлбэҕэ мууһунан сүүрүүгэ «Водоканал кубога» сэттис төгүлүн ыытыллыаҕа.

Күрэхтэһиигэ 600 киһи – идэтийбит дьон уонна күрэс бу көрүҥүн таптааччылар кыттыахтара. Кинилэр 3, 9 уонна 21 км ырааҕы сүүрүөхтэрэ.

Маны сэргэ икки эстафета буолуоҕа – тэрилтэлэр үлэһиттэригэр уонна сүүрүү кулууптарын чилиэннэригэр.

Сүүрүү 9:40 саҕаланар.  

Кыһыны атаарыыга ыҥыраллар

Сарсын күнүс 13:00 чаастан Култуура уонна сынньалаҥ пааркатыгар “Дьокуускай, сааһы көрүс!” диэн куорат уопсай бырааһынньыга саҕаланыаҕа.

Бырагыраамата киэҥ: көрдөөх-нардаах оонньуулар, күрэхтэр, айар кэлэктииптэр уонна эстрада артыыстара кыттыылаах кэнсиэр.

Күөх хонууга хайыһарынан сырсыыга маастар-кылаас

Сарсын оҕо аймахха, тренердэргэ, хайыһар спордун таптааччыларга уонна бэтэрээннэргэ умнуллубат күн күүтэр.

Күнүс 15.00 чаастан Күөх хонууга Саха сиригэр хайыһарынан сырсыы төрүттэммитэ 100 сылыгар аналлаах Хайыһар марафонун чэрчитинэн маастар-кылаастар ыытыллыахтара.

Ыҥырыылаах ыалдьыттарынан Ванкувердааҕы Олимпиада чемпиона Никита Крюков уонна Сочитааҕы Олимпиада үрүҥ көмүс призера Александр Бессмертных буолуохтара.  

Бэлисипиэтинэн күрэх

Сарсын, кулун тутар 28 күнүгэр, бэлисипиэт спордун таптааччыларга «Велосветлячки-2026» тэрээһин буолар.

Бэлисипиэтинэн күрэх маршрута:  Орджоникидзе болуоссата — Ленин проспега — Петровскай уул. — Ойуунускай уул. — Пушкин уул. — Таалай күөл — Толстой уул. — Короленко уул. — Щорс күөлэ — Курашов уул. — Лермонтов уул. — Дзержинскэй уул. — Өксөкүлээх Өлөксөй аатынан Норуоттар доҕордоһууларын дьиэтэ.

Мустуу – 20:00 чаастан Орджоникидзе болуоссата (фонтаҥҥа).

Хайыһар марафонун көтүтүмэҥ!

Бу баскыһыанньаҕа 202-с түөлбэҕэ баар Муус куоракка олимпиецтар Никита Крюков уонна Александр Бессмертных кыттыылаах хайыһар марафона ыытыллар.  

Тэрээһин параадтан саҕаланыаҕа. Маны таһынан ыалдьыттары аралдьытар бырагыраама, биатлоҥҥа маастар-кылаас, эстрада артыыстарын кэнсиэрэ күүтэр.

Саҕаланыыта – 10:30 ч.