«Күөх марафон» кэмигэр доруобуйаны босхо бэрэбиэркэлэтиэххэ сөп

Ити күн 2017 сылтан үтүө үгэскэ кубулуйбут «СберПрайм Күөх марафон» тэрээһин буолар. Бу 2017 сылтан ыытыллар аһымал аахсыйата.

Манна оҕолор уонна улахан дьон кыттыахтарын сөп. Сүүрэр уһуннара араас: 4–6 саастаах оҕолорго – 100 м, улахан дьоҥҥо (18 саастарыттан) – 4,2 км уонна 10 км. Кыттыы босхо. Билиҥҥи туругунан 1300-тэн тахса киһи суруттарбыт.

Быйылгы тэрээһин сүрүн уратытынан «Чэгиэн куорат» дьаарбаҥка буолуо. Ол курдук, сарсыарда 9:30 чаастан күнүс 13:00 чааска диэри киин куорат олохтоохторо уонна ыалдьыттара доруобуйаларын босхо бэрэбиэркэлэтиэхтэрин сөп: быраас сүбэтин-аматын ылыахтара, анаалыс туттарыахтара, харахтарын көрдөрүөхтэрэ, флюорографияны ааһыахтара, хаан баттааһынын уонна хааҥҥа кислород таһымын кээмэйдэтиэхтэрэ. Ону таһынан, Табахтан аккаастаныы аан дойдутааҕы күнүн чэрчитинэн көмө муннуга үлэлиэ, куһаҕан дьаллыктан босхолонуон баҕалаахтары психолог күүтэр.

Тэрийээччилэр уон биэстэн тахса араас былаһаакканы уонна маастар-кылаастары бэлэмнээтилэр: дьоҥҥо бастакы көмөнү оҥорууну үөрэтии, айар дьарыктар, чөл олоххо аналлаах VR-оонньуулар, остуол оонньуулара, арт-зоналар, ону тэҥэ сахалыы «Хабылык» уонна «Хаамыска» оонньуулар баар буолуохтара. «Харысхал» аһымал пуонда адаптивнай оонньуулары, аквагримы уонна мас оонньуурдары уруһуйдуурга маастар-кылааһы ыытыа.