К.Д. Уткин төрөөбүтэ 90 сылыгар аналлаах көрсүһүү

Саха саарына, учуонай, поэт, 1990-с сылларга төрүт култуураны сөргүтүспүт дьонтон биирдэстэрэ, үс түмэли төрүттээччи К.Д. Уткин-Нүһүлгэн төрөөбүтэ 90 сылыгар анаан кулун тутар 1 күнүгэр Ньурбаттан төрүттээх биир дойдулаахтара, аймах билэ дьоно, атастара-доҕотторо, үөрэнээччилэрэ, ыччат дьон Национальнай библиотека историческай дьиэтигэр муһуннулар.
Тэрээһини Ньурба куорат түмсүүтэ тэрийдэ, иилээн-саҕалаан СӨ култууратын үтүөлээх үлэһитэ М.Р. Гоголева ыытта.
Дьоро күҥҥэ иһирэх ахтыылар этилиннилэр, К.Д. Уткин тылларыгар ырыалар ылланнылар, Ньурба оһуокайа дьиэрэйдэ. Тэрийээччилэр сыл тухары улуу киһибитигэр аналлаах туох тэрээһиннэр былааннаналларын сырдаттылар: Дьокуускай куоракка өрөспүүбүлүкэтээҕи научнай-практическай конференция, поэт К.Д. Уткин тылларыгар айыллыбыт ырыаларынан кэнсиэр, профессор К.Д. Уткин аатынан судаарыстыбаннай бириэмийэ олохтонуута, учуонай-бөлүһүөк К.Д. Уткин олоҕун уонна үлэтин туһунан үөрэнэр босуобуйа тарҕаныыта о.д.а. 
Тэрээһин уостан түспэт ″Кэскил ырыатын″ күргүөмүнэн толоруунан уонна Ньурба тойуктаах оһуокайынан түмүктэннэ.