«Ийэ сүрэҕэ» долгутта

Биһиги нэһилиэкпитигэр Ньурба тыйаатыра ыалдьыттаан барда. Оскуолаҕа буолбут көрсүһүү бэрт истиҥник, иһирэхтик ааста, артыыстар оҕолор ыйытыыларыгар хоруйдаатылар.

Киэһэ Алексей Балакаев «Ийэ сүрэҕэ» диэн айымньытын көрдүбүт. Чахчы, үчүгэй испэктээк! Тыаһа-ууһа, уота-күөһэ, артыыстар оонньуулара көрөөччүлэр биһирэбиллэрин ылла. Оруолларга: ийэ – Сардана Михайлова, Миндьээ – Вера Лазарева, Ойууна – Саха Өрөспүүбүлүкэтин үтүөлээх артыыһа Майя Слепцова, Саарка – Надежда Афанасьева, Саарка чаҕардара – Олег Конощюк, Эдуард Ларионов,  Пүрпээ – Никита Григорьев.

Ийэ барахсан сүрэҕэ – оҕотугар. Бу дириҥ өйдөбүллээх уобараһы Сардаана Михайлова итэҕэтиилээхтик арыйда. Кинини кытта тэҥҥэ ити турукка киирэр курдуккун. Оттон Саарка оруолун толорбут Надежда Афанасьева – олус талааннаах артыыс, омсолоох дьоруой да буоллар, көрөөччүнү умсугутар кыахтаах эбит. Онон кини уобараһа өссө чаҕылхай!

Пүрпээни Саарка чаҕардара кэлэн ылар түгэннэригэр хамсаныылара испэктээги тыҥааһыннаан, киэркэтэн, тэтимирдэн биэрдэ. Итиннэ хараҥа күүс бүтүн аан дойдуну даҕаны сабырыйыан сөптөөҕүн көрдүбүт. Ол эрээри сырдык, ыраас тапталтан олох тиллэрин, тылларын итэҕэйдибит. Ийэ сүрэҕэр оҕото өрүү баар! Оттон уоллаах кыыс тапталлара уостубат аналлаах.

«Уот Дьулустаан» сериалга Сүөкүлэни оонньообут Майя Слепцованы көрөөт, тута биллибит. Кини оонньуурун көрөр – туспа дьол! Ханнык да уобараһы кыайа-хото тутар артыыс.

Ньурба тыйаатырыгар бу айымньы иккиһин туруута эбит. Бастакытын – Саха АССР үтүөлээх артыыһа, режиссер Спартак Слепцов, онтон режиссер Юрий Макаров туруорбут.

Худуоһунньук Дарья Тартакынова бэртээхэй үлэни оҥорбут. Барыта биир ситим. Сыана тыына, тыас-уус, муусука, ырыа, үҥкүү –көрөөччүнү калмык омук дойдутугар илдьэргэ дылы.

Бэртээхэй киэһэни бэлэхтээбит Ньурба тыйаатырын артыыстарыгар барҕа махтал! Айымньылаах үлэҕит ситиһиилээх буоллун, үгүс көрөөччүнү! Игидэй нэһилиэгэр саҥаттан саҥа испэктээгинэн ыалдьыттыы туруҥ.