Ийэ хапытаалын суумата уларыйыа

«Төрөппүттэр, араас чэпчэтиилэри туһанар категориялар ылар босуобуйалара, ийэ хапытаала — барыта 2027 сыл олунньу 1 күнүттэн инфляция таһымынан индексацияланыа. Тоҕо олунньу 1 күнүттэн? Тоҕо диэтэххэ тохсунньу устата ааспыт сыл түмүгүнэн инфляция чахчы таһыма быһаарыллар. Ол аата бары босуобуйалар, ийэ хапытаала инфляция таһымынан индексацияланыахтара», — диэн Госдуума үлэ, социальнай бэлиитикэ уонна бэтэрээннэр дьыалаларыгар кэмитиэтин бэрэссэдээтэлэ Ярослав Нилов ССТА-ҕа кэпсээтэ.

Кини этэринэн, индексацияламмыт ийэ хапытаалын сууматын билигин этэр кыах суох. Күһүн бырабыыталыстыба федеральнай бүддьүөт бырайыагын киллэриэ, инфляция таһыма онно учуоттаныа.

«Биир таһым көрүллүөн сөп, оттон дьиҥ инфляция атын буолуон сөп. Ол иһин тохсунньу 1 күнүттэн буолбакка, олунньу 1 күнүттэн бары төлөбүрдэр, босуобуйалар уонна ийэ хапытаалын кээмэйдэрэ эбиллэллэр», — диэн Нилов түмүктээтэ.

Кини эбэн эппитинэн, маннык пуормула хас да сыл устата үлэлээн кэллэ. Ону тэҥэ 2027 сыл олунньу 1 күнүгэр страховой биэнсийэлэр эмиэ эбиллиэхтэрэ, ол кэннэ муус устар 1 күнүгэр эбии индексация буолуон сөп.