Иван Гуляев дуоһунаһыттан босхолонно. Бэрэбиэркэ ыытыллар буолбут.

Бүгүн биллибитинэн, Иван Гуляев Окружной шоссеҕа баар авторынок таһыгар урукку күөл оннугар сиргэ көҥүл биэрэн, дуоһунаһыттан босхоломмут.

Ол курдук, бүгүн, балаҕан ыйын 11 күнүгэр, куорат баһылыгын бастакы солбуйааччы Андрей Лебедев Норуот фронун лиидэрэ Алексей Лаптевтан киирбит иһитиннэриинэн этиллэр учаастагы баран көрбүт. Информация быһыытынан, урукку күөл турбут сирин үрдэтэн, тутуу үлэтэ саҕаламмыт. 2025 сыллаахха бу учаастагы Цырен Ганжипов диэн урбаанньыт ылбыт. 2026 сыл от ыйын 31 күнүгэр манна тутуу ыытарга көҥүл бэриллибит. Оттон докумуону куорат баһылыгын эбээһинэһин быстах кэмҥэ толоро сылдьыбыт Иван Гуляев илии баттаабыт.

Биллэрин курдук, бу миэстэҕэ сир учаастага тахсыбыта элбэх мөккүөрдээх. Ол курдук, территория урукку күөл миэстэтин сабардыыр буолан, өр сылларга суутунан мөккүөр, холуобунай дьыала төрдө буола сылдьыбыт.

Андрей Лебедев этэринэн, маннык миэстэҕэ сир учаастагын биэрии сокуонунан көҥүллэммэт. Онон Иван Гуляев служебнай бэрэбиэркэ ыытыллар кэмигэр дуоһунаһыттан тохтотуллубут. 

Андрей Лебедев маннык түгэннэри Олохтоох дьаһалтаҕа биллэрэргэ ыҥырар. Мэрия нэдиэлэ аайы көҥүлэ суох тутуу ыытыллар түгэннэрин бэрэбиэркэлиир былааннаах.