IV-с «Киин куорат күөх Кубога» күрэх Улуу Кыайыы 80 сылыгар ананар

Сылын аайы куорат Олохтоох дьаһалтата тэрийэн ыытар «Киин куорат күөх Кубога» көҕөрдүү күрэҕэ быйыл саҥа хайысханан эбилиннэ – күрэххэ Улуу Кыайыы 80 сылыгар аналлаах «Кыайыы клумбата» диэн хайысха баар буолла.
Маны сэргэ үбүлүөйдээх сылынан тохсунньу 31 күнүттэн «Кыайыы буолуо 100 хонук хаалла» аахсыйа биллэрилиннэ. Куорат дьаһалтата нэһилиэнньэни «Кыайыы клумбата» патриотическай композицияҕа туһаныллар сибэкки арассаадатын олордон саҕалыырга ыҥырар. 
«Киин куорат күөх Кубога» күрэх бары номинацияларыгар үс бириистээх миэстэ олохтонно, ону таһынан «Город цветов» салон быйыл анал бирииһи олохтоото, диэн Тэрийэр кэмитиэт иһитиннэрэр.