Ититии тиһигин ыраастыыллар

Оттук сезонугар бэлэмнэнии чэрчитинэн элбэх кыбартыыралаах дьиэлэргэ, социальнай суолталаах тэрилтэлэргэ ититии ситимин ыраастыыр үлэ ыытыллар.

Ол курдук, ааспыт нэдиэлэ түмүгүнэн 2025-2026 сс. оттук сезонугар бэлэмнэнии ыстаабын уочараттаах мунньаҕар элбэх кыбартыыралаах дьиэлэр истэринээҕи ититии тиһигин 76%-на, социальнай эбийиэктэргэ 84%-на ыраастаммытын кэпсээтилэр.

Оттон «Теплоэнергия» АУо салайар хампаанньалар көрөр-истэр 894 элбэх кыбартыыралаах дьиэлэриттэн 489-гар (54%) ититии тиһигин ыраастыыр үлэни ыыппыттарын иһитиннэрдэ. Социальнай эбийиэктэргэ – 72 (50%).

ЯТЭЦ иһитиннэрбитинэн, 1443 элбэх кыбартыыралаах дьиэттэн 1133-гэр (79%) тиһиги ыраастыыр үлэ барбыт, 408 социальнай эбийиэктэн 298-гар (73 %) бу үлэ түмүктэммит.

Атын хааччыйар тэрилтэлэр 253 дьиэҕэ уонна 85 социальнай эбийиэккэ ититии систиэмэтин ыраастаабыттар.

Территориятааҕы уорганнар салайар тэрилтэлэр дьиэлэр ититиинэн хааччыллар тиһиктэрин ыраастыыр үлэлэрин хонтуруолга туталлар.