IT-исписэлиистэр кибер-массыанньыктары утары бииргэ үлэлэһэргэ бэлэмнэр

Олунньу 21 күнүгэр куорат баһылыга Евгений Григорьев үп-харчы уонна IT салаатын бэрэстэбиитэллэрин иннигэр отчуоттаата. 
Баһылык ааспыт 2024 сыл көрдөрүүлэринэн уонна үүммүт 2025 сыл былааннарынан отчуотугар дойду баһылыга Владимир Путин өйөбүлүн ылбыт Дьокуускай куорат 2030 сылга диэри сайдыытын маастар-былааныгар тохтоото.
2024 сыл маастар-былааны олоххо киллэрии бастакы сыла буолбутун, ол чэрчитинэн киин куоракка үс бөдөҥ уопсастыбаннай туона үлэҕэ киирбитин санатта – Ленин болуоссата, Р.М. Дмитриев аатынан уонна Сайсары эбэ кытыллара. 
Евгений Григорьев маны сэргэ дойду баһылыга Владимир Путин 2025 сылы Аҕа дойдуну араҥаччылааччы сылынан биллэрбитин, Саха Өрөспүүбүлүкэтигэр Ийэ дойдуну көмүскээччи сыла буола турарын, ол иитинэн уонна Улуу Кыайыы 80 сылынан Дьокуускай куоракка үтүмэн элбэх тэрээһин былааннаахтык ыытыллан саҕаламмытын бэлиэтээтэ.
2024 сылга куорат бүддьүөтэ 8,5% үрдээбит, ороскуот сүрүн чааһын үөрэхтээһин эйгэтэ ылбыт – 18,8 млрд солк., муниципальнай иэс кээмэйэ 278 мөл. солк. аччаабыт.
Куорат тус дохуота 14,6 млрд солк. тэҥнэспит.
Бүгүҥҥү күҥҥэ Дьокуускай куоракка креативнай экономика эйгэтигэр 14,4 тыһ. киһи үлэлиир, бу сыыппара өрөспүүбүлүкэ уопсай көрдөрүүтүн 73,4% тэҥнэһэр.
Үп-харчы уонна IT эйгэтин исписэлиистэрэ куорат баһылыгыттан Үлэ кыбаарталыгар сылдьар оптуобус маршрутун туруорустулар, куорат бүддьүөтүгэр эбии дохуоту киллэрэр ньымалары дьүүллэстилэр, сайыҥҥы өттүгэр Хатаска суол быылын намтатар үлэ ыытыллара, Үп-экономическай колледж 100 сылынан саҥа дьиэ тутуллара наадатын ыйдылар. IT исписэлиистэрэ маны сэргэ кибер-массыанньыктары утары бииргэ үлэлэһэргэ эттилэр, диэн иһитиннэрэр Олохтоох дьаһалта пресс-сулууспата.