Истиэҥ эн үрүҥ хаар сипсиэрин...
Худуоһунньук бу быыстапкатын тапталлаах төрөппүттэригэр анаата. Биэс оҕону күн сирин көрдөрбүт Ефросиния Николаевна уонна Геннадий Петрович Ивановтар – Саха сирин кыһыл көмүс кинигэтигэр киирбит дьиэ кэргэн. Эдита Геннадьевна төрөппүттэрэ оҕолорун үлэҕэ сыһыаран улаатыннарбыттар, бииргэ төрөөбүттэр бары үөрэхтээх, үлэһит дьон буола үүммүттэр.
“Биһигини үөһэттэн көрө, араҥаччылыы сылдьаллара буолуо диэн эрэнэбин”, – диэтэ худуоһунньук.
Үөрүүлээх тэрээһиҥҥэ истиҥ эҕэрдэлэр, махтал мааны тыллара этилиннилэр.
СӨ култуураҕа уонна духуобунай сайдыыга миниистирэ Афанасий Ноев Эдита Геннадьевна 1990 сылтан биир оскуолаҕа бэриниилээхтик үлэлии сылдьарын, ыччакка, үүнэр көлүөнэҕэ үтүө холобур буоларын, биир дойдулаахтара кининэн киэн тутталларын бэлиэтээтэ.
Саха Өрөспүүбүлүкэтин Национальнай ойуулуур-дьүһүннүүр түмэлин генеральнай дириэктэрэ Влада Тимофеева Эдита Геннадьевна 90-с сылларга айар үлэлэрин аартыга арыллыбыт көлүөнэ чаҕылхай бэрэстэбиитэлэ буоларын эттэ.
Култуура управлениетын начаалынньыга Сардаана Брызгалова Эдита Геннадьевнаҕа Дьокуускай куорат Олохтоох дьаһалтатын Махтал суругун уонна үрүҥ көмүс бэлиэтин туттарда.
Талааннаах педагогу кэлэктиибэ, үөрэтэр оҕолорун төрөппүттэрэ эҕэрдэлээтилэр.
“Оҕолору кытта үлэлиир дьон үөрэнээччилэрбитигэр элбэҕи биэрэбит, ону тэҥэ ыларбыт да үгүс. Оҕо олоҕу көрүүтэ ураты буолар, оттон бу айар үлэһиккэ олус наада. Баҕар, ол иһин сорох идиэйэ үөрэнээччилэрбиттэн буолуон сөп”, – диэтэ Л.А. Ким аатынан Оҕо ойуулуур-дьүһүннүүр искусствотын оскуолатын киэн туттар педагога.
Худуоһунньук түмэл салалтатыгар, быыстапка куратора Мария Ноговицынаҕа, бары сүүрбүт-көппүт үлэһиттэргэ, кэлэктиибигэр – Л.А. Ким аатынан Оҕо ойуулуур-дьүһүннүүр искусствотын оскуолатын салалтатыгар уонна үлэһиттэригэр махтал истиҥ тылларын анаата.
Эдита Степанова айымньылара СӨ Национальнай ойуулуур-дьүһүннүүр түмэлигэр хараллаллар, ону тэҥэ дойду араас муннуктарыгар, Германияҕа, Швецияҕа, Монголияҕа, Кытайга, Канадаҕа, о.д.а. дойдуларга чааһынай кэллиэксийэлэри хаҥаталлар.
«Киин куорат» суруналыыһа «Үрүҥ хаар сипсиэрэ» быыстапка туһунан санааларын манна киирэн аах.
Сонуннар
Ордук ааҕаллар
