Искэни улаата илигинэ быһаарыы олоҕу уһатар

“Ийэ доруобуйата” бырайыак 2024 сылтан үлэлиир. Ол кэмтэн саҕалаан, чинчийии көмөтүнэн   55 дьахтар искэнинэн ыалдьыбыта быһаарыллыбыт. Бу туһунан СӨ Доруобуйа харыстабылын министиэристибэтэ иһитиннэрэр.

Босхо оҥоһуллар маннык ыйытыгы уопсайа өрөспүүбүлүкэ 98 тыһ. олохтооҕо ааспыт.

Искэн ыарыыны утары үлэ “Уһун уонна көхтөөх олох” национальнай бырайыак иһинэн барарын билэҕит. Мэдиссиинэ тэрилтэлэрэ ыйытыгы тиһиги быспакка ыыталлар. Сэрэхэдийэр төрүөт баар түгэнинэр эмчиттэр дьахтары хайаан да босхо маммографияҕа эбэтэр оҕо хаатын чинчийэр диагностикаҕа ыыталлар. Бу икки көрүҥ искэн дойду олохтоохторун ортотугар ордук элбэхтик булуллар.

Туһааннаах бырайыак өрөспүүбүлүкэ куоратыгар олорооччулары эрэ буолбакка улуус, нэһилиэк олохтоохторун эмиэ хабар. Ол курдук, 40 сааһын ааспыт хас биирдии дьахтар олорор сиригэр баар эмтиир тэрилтэҕэ, ол иһигэр биэлсэр-акушер пуунугар итинник ыйытыгы ааһар кыахтаах. Ыалдьыбыт сибики баара сабаҕаланар түгэнигэр “күөх коридорунан”, онон-манан эргиппэккэ, уһата-кэҥэтэ барбакка өрөспүүбүлүкэтээҕи искэн диспансерыгар чинчийиигэ ыыталлар.  Кыалларынан, диагность түргэнник быһаарыллан, уталыппакка эмтиир сыал турар.

 98 тыһыынча ыйытык (анкета) толоруллубутуттан 50 түбэлтэтигэр түөс уонна оҕо хаатын шейкатыгар искэн тахсыбыта быһаарыллыбыт. 5 дьахтар мааткатыгар искэн тахсыбыта көстүбүт.

Доруобуйа харыстабылын миниистирэ Лена Афанасьева: «Искэн саҥардыы үөскээбит кэмигэр, кыра стадиятыгар булуу – өлөр өлүүттэн быыһыыр. Биһиги Саха сирин дьахтара ханна олороруттан тутулуга суох доруобуйатын туругун буор босхо көрдөрүнэрин хааччыйар бигэ тиһиги тэрийдибит», – диэн этэр.

Анал идэлээхтэр искэн төһөнөн эрдэ булуллар, эмтээһин тута саҕаланар да, оччонон эмтэнэр, үтүөрэр кыах улаатарын бэлиэтииллэр.