Искэн ыарыыларын көдьүүстээхтик эмтииргэ Spy Glass – аныгы кэм тиһигэ

Дьокуускайдааҕы өрөспүүбүлүкэ онкологияҕа диспансерын диагностика уонна түргэн эндоскопия салаатыгар чопчу диагностиканы оҥорорго, көдьүүстээхтик эмтииргэ көмөлөөх Spy Glass саҥа кэм тиһигин туруордулар.

Бу тиһик искэн ыарыыны чопчутук быһаарарга, эмтииргэ улахан көдьүүстээх буолара күүтүллэр.

Саҥа тиһик туһунан отделение салайааччыта Иван Яковлев: «Spy Glass ­ эндоскопияҕа дьиҥ чахчы өрөбөлүүссүйэ кэриэтэ, бу иннинэ кыаллыбат албастары оҥорор кыахтаах эндоскопист быраастар биир аныгы үстүрүмүөннэрэ. Үрдүк хаачыстыбалаах, чуолкай ойууну көрдөрөр буолан, үөс куолаҕайдарын (пути – Аапт.) ордук сиһилии чинчийэр, искэнтэн биопсияны чопчутук кыҥаан ылар кыаҕы биэрэр.
Бу иннинэ биопсияны рентгеноскопиянан көрөн ылар буоллахпытына, билигин быһа көрдөрөр холангиопсиянан ылар кыахтанныбыт», – диэтэ.

Маны тэҥэ Иван Яковлев бу тиһик көмөтүнэн процедуралары оҥоруу тэтимирэрин, инньэ гынан көрдөрүнээччилэр уонна үлэһиттэр ноҕуруускалара биллэ кыччыаҕын бэлиэтээн эттэ.
Бу диагностикалыырга туттуллар саҥа кэм тиһигэ отделение үлэтигэр номнуо көхтөөхтүк туһаныллан эрэр эбит, бастакы түмүктэр көдьүүстэрэ, көрдөрүүлэрэ үрдүгэ бэлиэтэнэр. «Spy Glass тиһиги хас даҕаны уустук түбэлтэҕэ номнуо туһанан көрдүбүт. Түмүктэр көһүппүппүтүн баһыйдылар. Холобур, бүтэһик түгэни аҕыннахха, биллибэт генезтээх быар протокатын кыарааһынын холангоскопиятын ситиһиилээхтик оҥордубут. Эпэрээссийэни отделениебыт уопуттаах эндоскопист бырааһа Юрий Алексеевич Максимовы кытта оҥордубут. Саҥа оборудование уонна холбоһуктаах үлэ көмөтүнэн диагностика эпэрээссийэтин муҥутуур чопчутук олох кыра алдьатыылаах оҥорору ситистибит», – диэн Иван Иванович санаатын үллэһиннэ.

Бу курдук, өрөспүүбүлүкэтээҕи онкология киинэ салгыы сайдарга, искэн ыарыыларын эмтииргэ инники күөҥҥэ турар саҥа ньымалары олоххо киллэрэргэ өрүү дьулуһара эмтээһин көрдөрүүтэ үрдүүрүгэр, ыалдьааччы ахсаана аҕыйыырыгар эрэли саҕар.