Искэн 46 % эрдэтинэ көстүбүт

Көрдөрүү тупсуу диэки баран эрэригэр Дьокуускайга 2024 сыллаахха Искэни эмтиир клиника тутуллан үлэҕэ киирбитэ төһүү буолбут. Аныгы ирдэбилгэ эппиэттиир араас тэриллэрдээх, онно эппиэттэһэр хааччыллыылаах тутуу, идэтийбит исписэлиистэрдээх балыыһа бэйэбитигэр аһыллан, киин сирдэргэ бара сатыыр кыһалҕа тохтообут.

Онкология саҥа киинэ үлэҕэ киириэҕиттэн 123 тыһыынча көрдөрүү (приём) буолбут, итинтэн 4,4 тыһыынчаттан тахса түбэлтэтигэр искэн буулаабыта биллибит. Саха сирин онкологтара рак ыарыы саҕаламмытын таба тайанарга уонна эмтииргэ көмөлөһөр аныгы технология ньымаларын олоххо салгыы киллэрэллэр.

Искэн киинэ үлэҕэ киириэҕиттэн 60-тан тахса үрдүк технология туттуллар тэрилин аҕалан туруорбуттар. Эмтиир да, ыарыыны эрдэтинэ билии да көрдөрүүтэ хас да бүк үрдээбитэ этиллэр.

Былырыын онкоскринины өрөспүүбүлүкэ олохтоохторо 95 878-та барбыттар. Маннык скрининг кэбиниэттэрэ билигин мэдисииннэ 14 тэрилтэтигэр уонна искэннээхтэргэ тастан көмөлөһөр 17 кииҥҥэ (ЦАОП)  үлэлииллэр эбит.

Ыарыы эрдэ биллиитигэр «ОНКОПОИСК» бырайыак үлэлээбитэ биллэ туһалаабыта саарбаҕа суох. Бу инновациялаах платформаны 2020 сыллаахха Дьокуускайдааҕы Искэн диспансерын исписэлиистэрэ толкуйдаан олоххо киллэрбиттэрэ.

Ону тэҥэ ыарыы эрдэ булуллуутугар Саха сирин ыраах сытар Орто Халыма, Томпо, Анаабыр, Ньурба, Бүлүү, Мииринэй уонна бэтэрээҥҥилэртэн Нам улууһугар  «Онкодесаннары» тэрийии көмөлөспүтэ чуолкай. Ити сырыыга быраастар 1,5 тыһ. киһини көрбүттэр-истибиттэр. Кинилэртэн 86 киһини, салгыы чинчийии ирдэнэр буолан, Дьокуускайга көрдөрүнэ ыыппыттар. 14 киһиэхэ искэн диагноһа аан бастакытын саҥа биллэн эрдэҕинэ көстүбүт.

Быйыл итинник «Онкодесант» Алдан, Амма, Үөһээ Бүлүү, Бүлүү, Ленскэй, Өлүөхүмэ, Нам, Нерюнгри, Ньурба, Томпо, Чурапчы уонна Уус Майа оройуоннарыгар былааннаммыт.

Мобильнай хамаандаҕа онкогинеколог, онкохирург, маммолог, УЗИ бырааһа уонна эндоскопист киирсэллэр.