Исидор Барахов кинигэтэ

Светлана Даниловна Копыленко, түмэл салайааччыта:

– 2013 сыллаахтан тэриллэн үлэлии олорор судаарыстыбаннас музейын киэн туттар экспонаттарыттан биир уһулуччу күндүбүт – Исидор Никифорович Барахов «от корочки до корочки» аахпыт, Емельян Ярославскай 1933 с. таһаартарбыт «История ВКП (б)” диэн ааптар бэйэтэ “учебник” диэбит халыҥ тастаах кинигэтэ буолар.

Кинигэ форсаһыгар уонна хаҕыгар Исидор Никифорович илии баттааһыннара баар. Уопсайа 304 сирэйдээх. Онно, хас биирдии сирэйгэ, Исидор Никифорович халлаан күөҕэ уонна кыһыл, боростуой харандаастарынан тиэкиһи аннынан тардыбыт.

Аны лиистэр  поляларыгар боростуой харандааһынан бэлиэтээһиннэри оҥорбут. 107-с сирэйгэ 7 киһи хаартыската киирбит. Манна биир киһи мэтириэтин ойо быһан ылбыттар, аатын чэрэниилэнэн хараардыбыттар. Биир маннык көстүү 158-с сирэйгэ баар.

281-с сирэйтэн ыйынньык саҕаланар. Манна оччотооҕу кэмҥэ историяны оҥорбут дьон ааттара киирбит. Олор истэригэр сэбиэскэй былааһы утарбыт дьон ааттарын чэрэниилэнэн хараардыбыттара баар. Ол хараардыллыбыт сирдэри утары аны боростуой харандааһынан араспаанньаларын суруйан биэрбиттэр.