Инникитин билээри албыҥҥа киирэн биэрбит

70 саастаах дьахтар 2025 сыл алтынньытыгар “инникини билгэлээһин уонна харчыны тардар сиэр-туом” өҥөлөрүн туһунан биллэриинэн Айталыын диэн киһиэхэ тиийбит. Кини чахчы экстрасенс буолара дуу, суоҕа дуу биллибэт, ол эрээри биэнсийэлээх киниэхэ итэҕэйбит.

“Өҥө” тэйиччиттэн оҥоһуллубутун кэнниттэн биэнсийэлээх уонна эдэр киһи икки ардыгар истиҥ, итэҕэллээх сыһыан үөскээбит. Түмүгэр, “айдарыылаахпыт” киниэхэ харчы иэс биэрэригэр көрдөспүт, төннөрүөм диэн эрэннэрбит.

“Силиэстийэ барыллааһынынан, уорбаланааччы, дьахтары албыннаан, харчытын төннөрөр эбэһээтэлистибэни толорор дьиҥ санаата суох, 265 тыһыынча солкуобайын уорбут”, – диэн прокуратура пресс-сулууспата иһитиннэрэр.

Суд Айталыыны түөкүннээһиҥҥэ буруйдаабыт уонна 150 тыһыынча солкуобайга ыстарааптаабыт, ону таһынан биэнсийэлээххэ 255 тыһыынча солкуобайы төннөрөргө уурбут. Албынньыт харчыта арестаммыт, төлөпүөнэ былдьаммыт. Суут бириигэбэрэ сокуоннай күүһүгэр киирэ илик, буруйданааччы ааһынар бырааптаах.