Инклюзивнай уһуйаан бөлөҕөр наадыйааччыларга

203-с дьоҕус оройуоҥҥа баар "Звездочка" 1 №-дээх уһуйааҥҥа 1 сааһыттан 3-гэр диэри саастаах оҕолору инклюзивнай бөлөхтөргө сырытыннарыахха сөп. Бу уһуйаан иһинэн "Инклюзивнай практика киинэ" аһыллан үлэлиир. 

Быстах кэмҥэ сылдьар бөлөххө (өссө биир аата "Служба ранней помощи") оҕо сайдыытыгар кэһиллиилээҕэ, хаалыылааҕа сабаҕаланар буоллаҕына ылаллар. Оҕолору ылалларыгар специалистар оҕону көрөллөр-истэллэр, төрөппүттэри анкеталыыллар, онтон кэпсэтиигэ ыҥыраллар.

"Уратыта диэн бу бөлөххө ПМПК курдук анал хамыыһыйаны ааһар ирдэммэт. Оҕолору кытта специалистар дьарыктаналлар, ону тэҥэ адаптивнай физкультура уонна муусука дьарыктара бааллар", - диэн "Звездочка" уһуйааҥҥа иһитиннэрдилэр.  

"Звездочка" уһуйаан аадырыһа: 203-с дьоҕус оройуон, Ларионов уул., 14. 

Билсэр төл.: 8-965-996-64-47 (09:00 чаастан 16:00 диэри, үлэ күнүгэр, бассаабынан суруйаҕыт).