Инклюзивнай үөрэхтээһинтэн тирэх ылан – олох киэҥ аартыгар

Доруобуйаларынан хааччахтаах оҕолорго аналлаах инклюзивнай үөрэхтээһин иитинэн бу күннэргэ Мөлтөхтүк саҥарар оҕолор оскуола-интэринээттэрэ тэрийбит «Абилимпикс. Юниоры» күрэҕэ Хаҥалас, Чурапчы, Амма улуустарыттан уонна Дьокуускай куораттан 8-тан 13-гэр диэри саастаах 80 эдэр талааны түмтэ.

– «Пельмени лепить люблю всей семьей», – дии олорор бу, – диир Дана Карамзина, үс оҕолоох ийэ. – Икки улахан уолаттар устудьуоннар. Василий – кырабыт. Марха 1 №-дээх оскуолатын 4 кылааһын үөрэнээччитэ. Бэйэм үлэ уруогун учууталабын. Уонна советник эбээһинэстээхпин. Оскуолабытыгар 1114 оҕо үөрэнэр. ОВЗ-лаах оҕо элбэх. Инклюзивнай үөрэхтээһин бырагырааматынан үөрэнэбит. Ол курдук, доруобуйаларынан хааччахтаах оҕолор тус бырагырааманан үөрэнэллэр, психолого-педагогическай көмө өрүү оҥоһуллар.
Бэйэм айылҕаттан ураты оҕолоох буоламмын, маннык тэрээһиннэргэ кыахпыт баарынан кыттабыт. Вася ас астыырын олус сөбүлүүр. Ааспыт нэдиэлэҕэ мөлтөхтүк саҥарар оҕолор анал оскуола-интэринээттэрин баазатыгар ыытыллыбыт чемпионакка кытынныбыт. Урут бу оскуолаҕа эргэ мас дьиэҕэ олорор эрдэхтэринэ сылдьыбытым. Билигин сабыс-саҥа таас оскуола тутуллубутун көрөн олус үөрдүм. Оскуола интэринээттээҕин, оҕолор олорор хосторо ырааһын, сырдыгын хайҕаатым. Мип-минньигэс астаах остолобуойдаахтар. Онон олус үчүгэй усулуобуйа тэриллибитин көрөн төрөппүт быһыытынан астынным.
Бу буолан ааспыт «Абилимпикс. Юниоры» күрэх оҕону идэҕэ бэлэмниир сыаллаах 14 хайысханан ыытылынна: повар, зуботехник, официант, музей үлэһитэ, тыйаатыр, ИЗО, вокал, маһынан уһаныы, оҕуруонан тиһии, хомус, о.д.а.

Марха 1 №-дээх оскуолатын 4 кылааһын үөрэнээчччитэ Вася Карамзин бу күрэххэ быйыл бастакы хардыытын оҥорбутун ааһан, икки компетенцияҕа тэҥинэн ситиһиилээхтик кыттыбыт: «Бисероплетение» уонна «Поварское дело». Ийэтэ Дана Яковлевна бэлиэтииринэн, Василий дьиэтигэр итини сэргэ уруһуйдуур, пластилинныыр, робототехниканан дьарыктанар буоллаҕына, кэлин өссө чааһы-чааһынан боолдьоҕу хатайдыыр буолбут.

Санатар буоллахха, I Өрөспүүбүлүкэтээҕи «Абилимпикс. Юниоры» чемпионат Дьокуускайга кулун тутар 27-29 күннэригэр буолан ааста уонна, оҕо хас саастааҕа уонна доруобуйатын туруга айар дьоҕуру сайыннарарга уонна идэни баһылыырга хааччах буолбатаҕын көрдөрөн, инклюзивнай үөрэхтээһини сайыннарыыга дьоһун хардыыны оҥордо. Онон тэрийээччилэр бу чемпионаты сыл аайы ыытар уонна компетенциятын көрүҥүн элбэтэр былааннаахтар.