Инфраструктураҕа үбү хомуйуу туһунан аһаҕастык

Алтынньы 21 күнүгэр Олохтоох дьаһалтаҕа киин куоракка инфраструктураҕа үбү хомуйууну киллэрии тула аһаҕас истиилэр буоллулар. Кыттааччылар үгүстэрэ көҕүлээһини өйүүллэрин биллэрдилэр. 

Куорат баһылыгын солбуйааччы Антон Алексеенко бэлиэтээбитинэн, куоракка оскуолаҕа уонна уһуйааҥҥа миэстэ тиийбэт сирдэригэр биирдиилээн дьиэни тутааччыларга инфраструктураҕа үбү хомуйуу киириэ. Оттон бырайыактарыгар социальнай инфраструктура эбийиэктэрэ көрүллэр, сири-уоту биир кэлим сайыннарыы (КРТ)  бырайыактарын олоххо киллэрэр тутааччылартан ол ирдэниэ суоҕа.

Инфраструктураҕа анаан хомуллубут үп-харчы үөрэхтээһин материальнай-тэхиньиичэскэй базатын сайыннарыыга уонна бөҕөргөтүүгэ ыытыллыаҕа.  

Барыллаан ааҕыынан инфраструктураҕа үбү хомуйуу кээмэйэ 1 кв. м быһа холоон 3 тыһ. солк. тэҥнэһиэ.

Алексеенко быһаарбытынан, бу куоракка оскуолалары тутуу боппуруоһа быһаарылларыгар көмө буолуоҕа. Күн бүгүн куорат оскуолалара икки бүк кэриҥэ туолан олороллор, чуолаан куорат киинигэр быһыы-майгы ордук сытыытык турар – кылааска 35-40 оҕо үөрэнэргэ күһэллэр.

Бэлиэтээн эттэххэ, социальнай эбийиэктэринэн хааччыллыбатах сирдэргэ тутуу ыытылларыгар көҥүл бэриллибэт. Сири-уоту биир кэлим сайыннарыы (КРТ) бырайыактарын олоххо киллэрэр тутааччылар маннык көҥүлү хааччаҕа суох ылаллар, дьаһалта төһө кыайарынан көмөлөһөр.    

Алексеенко иһитиннэрбитинэн, инфраструктураҕа үбү хомуйуу Арассыыйа куораттарыгар хото туһаныллар. Холобур, Москваҕа, Санкт-Петербурга, Пермҥэ, Омскайга үтүө түмүктээҕэ бэлиэтэнэр, сотору кэминэн маннык хомуйуу Казань уонна Новосибирскай куораттарга киириэҕэ. 

Куорат олохтоохторо, төрөппүттэр, учууталлар, дьокутааттар, үөрэх тэрилтэлэрин салайааччылара көҕүлээһин киирэрин биир киһи курдук өйүүллэрин биллэрдилэр.

Тутааччылар бэрэстэбиитэллэрэ инфраструктураҕа үбү хомуйууну утаралларын эттилэр, баҕар, ити дьиэ-уот сыаната үрдүүрүгэр тиэрдиэ диэтилэр. Маныаха куорат баһылыгын солбуйааччы Дьокуускайга киирэр хомуйуу кээмэйэ, атын куораттарга холоотоххо, быдан кыра буолуоҕа, онон сыана үрдүө суохтаах диэтэ.

Аһаҕас истиилэргэ киирбит тыл этии, ыйытыы, этии барыта боротокуолга киирдэ, салгыы үлэҕэ учуоттаныаҕа. 

Хаартыска: “Якутск” ТГ-ханаалтан