Инбэлиит доруобуйатын чөлүгэр түһэрэртэн саҕалаан, үлэлээх буолуутугар тиийэ көмөлөһөллөр
Кини онно инбэлиит дьону өйүүр, доруобуйаларын чөлүгэр түһэрэр, уопсастыбаҕа бэйэ миэстэтин булуналларыгар көмөлөөх үлэ тиһиктээхтик барара наадатын тоһоҕолоон бэлиэтээтэ. Мунньахха нэһилиэнньэ дьарыктаах буолуутун эйгэтигэр сыһыаннаан, доруобуйаларыгар аһааҕырыылаах дьону кэлимник реабилитациялыыр уонна абилитациялыыр боппуруоһу көрдүлэр.
Манна тоҕоостоох иһитиннэриини СӨ Нэһилиэнньэ дьарыктаах буолуутугар судаарыстыбаннай кэмитиэт бэрэссэдээтэлэ Светлана Горюшинская оҥордо. Кини онно инбэлииттэри үлэнэн хааччыйыыга уонна идэҕэ үөрүйэхтэниилэригэр туһуланар миэрэлэргэ тохтоото.
С.Горюшинская эппитинэн, итинник үлэ чэрчитинэн, 205 инбэлииккэ үлэ булан биэрбиттэрин, үлэ булалларыгар көмө – 555 киһиэхэ оҥоһуллубут. Профориентацияҕа сыһыаннаах тэрээһиннэригэр 318 киһи кыттыбыт, 21 киһи идэ ылара хааччыллыбыт.
Бүгүҥҥү күн сытыы боппуруостарынан биирдэстэрэ – анал байыаннай дьайыыттан инбэлиит буолан эргиллибиттэр эт-сиин, доруобуйа, уйулҕа өттүнэн чөлүгэр түһэрии үтүө түмүктээх, дьиҥ көдьүүстээх буолуутун ситиһии буолар.
Адаптивнай физическэй култуура уонна успуорт Өрөспүүбүлүкэтээҕи киинин дириэктэрэ Нюргун Иванов тыл эттэ. Кини онно бэтэрээннэр туруктарын чөлүгэр түһэриигэ, социальнай адаптацияны ааһалларыгар адаптивнай успуорт улахан суолталааҕын бэлиэтээтэ. Саха сиригэр төрдүс сылын үлэлиир «Эр хоһуун» адаптивнай успуорт көмөтүнэн физическэй уонна социальнай реабилитацияны кэлимник дьарыктанарын кэпсээтэ.
Күн бүгүн успуорт министиэристибэтин эбийиэктэригэр СВО бэтэрээннэрэ успуорт 8 араас көрүҥэр дьарыктаналлар эбит. О.и. оҕунан ытыы остуол тенниһэ, олорон эрэ волейбол, буулдьанан ытыы, армрестлинг, пауэрлифтинг, чэпчэки атлетика, харбааһын дьарыктара бааллар. Билиҥҥи туругунан РЦАФКиС сиэксийэлэригэр доруобуйатынан хааччахтаах анал байыаннай дьайыы 18 бэтэрээнэ дьарыктанарын эттэ.
Доруобуйа харыстабылын миниистирин бастакы солбуйааччы Дмитрий Сергин өрөспүүбүлүкэ инбэлииттэригэр мэдиссиинэ көмөтүн оҥоруу туһунан кэпсээтэ.
Онно этиллибитинэн, бу дьыл алта инники ыйыгар мэдиссиинэ реабилитациятын 823 инбэлиит ааспыт. Ити иһигэр доруобуйатынан хааччахтаах 252 оҕо баар.
Ону тэҥэ бу мунньахха инбэлиит дьон социокультурнай реабилитацияны ааһалларыгар «Единая цифровая платформа в социальной сфере» ГИС-и туһаныыны киллэрэр туһунан эмиэ таарыйдылар.
Бастыҥнары чиэстээтилэр
Мунньах үөрүүлээх чааһыгар Бүтүн Арассыыйатааҕы идэҕэ ситиһии «ИнваПрофи» куонкурус эрэгийиэннээҕи түһүмэҕин кыайыылаахтарын, бириистээхтэрин наҕараадалары туттарыы буолла.
Онно инбэлиит оҕолору үөрэтэр, улахан дьону идэҕэ үөрэтэр кыһалар бастыҥ предметик-педагогтарынан быһаарыллыбыт учууталлары, преподавателлэри бэлиэтээтилэр.
Георгий Степанов Үлэ уонна социальнай сайдыы министиэристибэтигэр, куонкуруһу тэрийээччилэргэ эрэгийиэн таһымнаах күрэхтэһиигэ элбэх кыттааччыны сэҥээрдибиттэрин, күрэх үрдүк таһымнаахтык ааспытын иһин махтанарын биллэрдэ. Кыайыы кынаттаммыт кыттааччыларга дойду таһымыгар ситиһиилэнэллэригэр баҕарда.
Сонуннар
Ордук ааҕаллар
