«Ильмень үрдүнэн туруйалар» мемориалга сибэкки дьөрбөтүн уурдулар

Олунньу 23 күнүгэр Дьокуускайга «Ильмень үрдүнэн туруйалар» мемориальнай комплекска былаас, уопсастыбаннас бэрэстэбиитэллэрэ үгэс быһыытынынан сибэкки дьөрбөтүн ууран, Аҕа дойду сэриитин биир быһаарыылаах түгэнигэр кыттыыны ылбыт биир дойдулаахтарбытыгар сүгүрүйэн аастылар. 
Тэрээһиҥҥэ Ил Түмэн бэрэссэдээтэлэ Алексей Еремеев, норуот дьокутааттара, өрөспүүбүлүкэ бырабыыталыстыбатын салайааччылара, ыччат министирин э.т. Игорь Юргин, Дьокуускай куорат Дууматын салайааччыта Альберт Семенов, баһылык Евгений Григорьев, байыаннайдар о.д.а. кыттыыны ыллылар.

Тыл этээччилэр 1943 с. Ильмень күөлгэ кыргыһыыга 19-с хайыһар биригээдэтин састаабыгар кыттыбыт Саха сирин буойуттарын хорсун быһыылара үйэлэргэ умнуллуо суохтаах диэҥҥэ тохтоотулар.
Ил Түмэн бэрэссэдээтэлэ Алексей Еремеев аныгы үйэҕэ историяны кырдьыктаахтык үөрэтии сүҥкэн суолталааҕын бэлиэтээтэ. 

Дьокуускай куорат баһылыга Евгений Григорьев история бу кэрчик кэмин анал байыаннай дьайыыны кытта ситимнээн Аҕа дойду көмүскээччи күнэ көннөрү бырааһынньык буолбатах, бу – көлүөнэлэр ситимнэрин быһыытынан Ийэ дойдуга бэриниилээх буолуу тулхадыйбат бэлиэтэ буоларын санатта.
Бу күн анал байыаннай дьайыы кыттыылааҕа Айаал Петровка «Хорсунун иһин» мэтээли туттардылар, диэн Олохтоох дьаһалта пресс-сулууспата иһитиннэрэр.