Иллэҥ кэмҥин туһалаахтык атаар

Ырыаны таптааччыларга, кэнсиэри биһирээччилэргэ

Бу да хайысхаҕа балачча тэрээһин былааннаммыт. “Хайатын талан сылдьабын?” диэн толкуйга түһээччи үгүс буолсу.

*Холобур, олунньу 21 уонна 22 күннэригэр Эстрада тыйаатырыгар  тыыннаах муусука дьоһуннаах, алыптаах туоната тэнийэр буолбут. Саха эстрадатын артыыстара Аскалон Павлов, Эрчим, Тамара Попова, Санита Ай, Эрхан, Анастасия Готовцева, Умсуура о.д.а. хит буолбут ырыалара дуорайыа. Кэнсиэр олунньу 21 күнүгэр – 18.30 ч., олунньу 22 күнүгэр  16.00 ч. саҕаланар. Кэрэхсэбиллээҕэ, билиэти Пушкин каартатынан эмиэ ылыахха сөп.

* Олунньу 21 күнүгэр – "Сахалыы сериал ырыалара" кэнсиэр.

Үгүс көрөөччү өйүгэр-санаатыгар үтүө өйдөбүлү хаалларбыт, төрөөбүт төрүт тылбытынан уһуллубут «Хаһан сайын буоларый…», «Омоон суоллар», «Быстыбат ситим», «Кыргыттар», «Дьол тааһа», «Сайда тур, Сахам сирэ!», «Аламай таас», «Хирурдар», «Ааспыт ааспат амната», «Уот Дьулустаан», «Мин таптыыр спутнигым», «Тумарык» киинэлэри көрбүккүт эрэбил. Дьэ, бу киинэлэр ырыаларын, матыыптарын кимнээх айан-тутан таһаарбыттарын, толорбуттарын билэр, ол толорууларын эт кулгааххытынан истэр, илэ хараххытынан көрөр бэлиэ түгэн тосхойор. Кэнсиэр “Сэргэлээх” КК 19.00 ч. буолар.

* Олунньу 22 күнүгэр 17.00 ч. Оҕо дыбарыаһыгар өрөспүүбүлүкэ киэҥник биллэр ырыа айааччылара, ырыаһыттара уостан түспэт бэлиэ ырыалары эһиэхэ бэлэхтиэхтэрэ. Норуот таптыыр ырыаһыттара Екатерина, Алексей Егоровтар, В. Заболоцкай, В. Татаринов, С. Васильев, А. Готовцева, В. Аманатова, Н. Андросов, Н. Роббек, И. Брызгалов, Ф. Иванова, Л. Спиридонова, Л. Слепцова – Бандерова, С. Осипова, Елена, Иван Тулааһынаптар, И. Иванов, В. Туманов, В. Петухов, Е. Дегтярев кытталлар.

*Оттон классическай муусуканы сөбүлээччилэри олунньу 22 күнүгэр 18.00 ч. Опера уонна балет тыйаатырын кэнсиэртиир камернай саалатыгар А. Борисова, А. Афанасьева-Адамова, П. Герасимова, З. Колодезникова, Д. Охлопкова, С. Павлова, М. Шапошникова, О. Чемпосова  күүтэллэр. Бырагыраамаҕа Аҕа дойду көмүскээччилэригэр сыһыаннаах ариялар, дуэттар, романстар уонна ырыалар киирбиттэр.

*Манна үгүс тэрээһинтэн сороҕо эрэ киирдэ, афиша якт. киирэн, сиһилии билсиэххитин сөп.

История пааркатыгар

Аҕа дойдуну көмүскээччилэр күннэрин көрсө, бу дьыл олунньу 18-21 күннэригэр, «Арассыыйа – мин дойдум» историческай пааркаҕа оскуола үөрэнээччилэригэр анал бырагыраама былааннаммыт. Чопчута, 2-5 кылаас үөрэнээччилэригэр. Билиини хаҥатар ис хоһоонноох лиэксийэлэр, биктэриинэлэр буолуохтара. Кумааҕыттан араас оҥоһуктары бэлэмнииргэ маастар-кылаастары тэрийиэхтэрэ.

Интэриэһинэйэ, 1,5 чаас уһуннаах «В поисках героев» диэн оонньуу квест буолуоҕа. Доруобуйаларын хааччахтаах, элбэх оҕолоох ыаллар уонна СВО кыттыылаахтарын дьиэ кэргэннэрин оҕолоругар киирии билиэт сыаната чэпчэтиилээх диэбиттэр. Саҕаланар бириэмэтэ: сарсыарда 11 уонна күнүс 15 чаастан.

Аркадий Гайдар аатынан дьиэ кэргэнинэн ааҕар бибилэтиэкэҕэ

Олунньу 20 күнүгэр, чэппиэргэ, күнүс 15 ч. оскуола оҕолоругар  аналлаах “Мин Дьокуускай устун хааман иһэбин” квиз тэриллэр. Манна кыттыбыттар оонньуу таарыйа ирбэт тоҥҥо турар тапталлаах куораппыт туһунан элбэх сонуну, уратыны истиэхтэрэ, билиилэрин хаҥатыахтара. Ааҕар саала аадырыһа – Ленин пр., 7/2 нүөмэрэ. Киирии төлөбүрдээх, Пушкин каартатынан туһаныахха сөп.

Циркэҕэ

Расторгуевтар ааттарынан Судаарыстыбаннай циркэ иһинэн үлэлиир оҕо устуудьуйатыгар 7-10 саастаах уолаттары циркэ ускуустубатын сэргэх, бэһиэлэй уонна туһалаах дьарыгар кыттарга ыҥырбыттар.

Оҕолору идэтийбит артыыстар уонна тириэньэрдэр дьарыктыахтара, сатаан артыыстыырга уонна үҥкүү маастарыстыбатыгар үөрэтиэхтэрэ. Циркэ аренатыгар буолар куонкурустарга, бэстибээллэргэ кыттар кыах тосхойуо. Сэргээбиттэр +7-9142611586 эрийэн ыйыталаһыҥ. Тэрийээччилэр эрдэттэн суруйтарыы наадатын ыйбыттар. 

Уруһуйдьуттар быыстапкалара

Уруһуй ускуустубатын, скульптураны сэргээччилэргэ бэрт интэриэһинэй, сэргэх кэм үүннэ. Туттумахтаһыҥ.

*Ол курдук, олунньу 15 күнүттэн саҕалаан, Национальнай ойуулуур-дьүһүннүүр мусуойга Саха сирин аатырбыт график худуоһунньуга А.П. МУНХАЛОВ (1935-2014) хартыыналарын “Кыайыы уонна Эйэ” диэн быыстапката буола турар.

Афанасий Петрович Мунхалов – Арассыыйа графическай ускуустубатын биир чаҕылхай бэрэстэбиитэлэ, П.А. Ойуунускай аатынан өрөспүүбүлүкэтээҕи  судаарыстыбаннай бириэмийэ бастакы лауреата (1966), дойду норуодунай худуоһунньуга (1982), норуоттар икки ардыларынааҕы быыстапка дипломана. Кини үлэлэрэ аатырбыт Третьяков галереятыгар, А.С. Пушкин аатынан ойуулуур-дьүһүннүүр ускуустуба судаарыстыбаннай мусуойугар, Нуучча судаарыстыбаннай мусуойугар, СӨ национальнай уус-уран мусуойугар, Германияҕа Дрезденнээҕи хартыына галереятыгар, араас дойдулар чааһынай кэллиэксийэлэригэр тураллар. Түгэни туһанан, быйыл төрөөбүтэ 90 сылын туолар талааннаах худуоһунньук үлэлэрин илэ хараххытынан көрөн астыныҥ. Быыстапка кулун тутар 23 күнүгэр диэри туруоҕа.

*Таарыйа, аатырбыт Даши НАМДАКОВ “Стихия. Даши Намдаков” быыстапкатыгар сылдьар кыахтааххыт. Бу икки быыстапкаҕа иккиэннэригэр Пушкин каартатынан киириэххэ сөбүн санатабыт. Намдаков быыстапката балаҕан ыйын 14 күнүгэр диэри туруоҕа.

*Оттон “Үрдэл” арт-галереяҕа эһигини дьон киэҥ биһирэбилин ылбыт самодеятельнай худуоһунньук Николай РЯЗАНСКАЙ “«Кустук түһэр Аммабар» быыстапката буола турар. Тыа сириттэн төрүттээх, төрөөбүт-үөскээбит түөлбэлэрин ахтар-саныыр дьон кини үлэлэрин көрөн дуоһуйуоххут, астыныаххыт. Быыстапка олунньу 28 күнүгэр диэри үлэлиир.

Былыргы Дьокуускай каарталарын көрбүтүҥ?

Илик буоллаҕына, Саха Национальнай бибилэтиэкэтин историческай саалатын иккис этээһигэр тиэтэй. Манна олунньу 12 күнүттэн “Дьокуускай куорат былыргы былааннара (каарталара)” диэн быыстапка үлэлии турар. Куораппыт сэдэхтик көстөр былыргы каарталара – култуурабыт нэһилиэстибэтэ, барҕа баайа. Урукку уонна билиҥҥи куораты тэҥнээн, анааран көрөргө тоҕоостоох түгэни мүччү тутумаҥ. Холобур, 1939 с. куорат каартатын билсиэххит. Киирии – босхо. Бу быыстапка олунньу 28 күнүгэр диэри туруоҕа.