Ил Дарханы кытта быһа кэпсэтиигэ 1 672 ыйытыы киирдэ

СӨ Ил Дархана Айсен Николаев үгэс буолбут Саха сирин олохтоохторун кытта быһа кэпсэтиитэ 3 чаас 22 мүнүүтэ устата буолла. Саха сирин эрэгийиэнин салайар Киин иһитиннэрбитинэн, барыта 1 672 ыйытыы киирдэ.

Ил Дархан өрөспүүбүлүкэ сайдыытын сүрүн тосхоллорун, тутаах хайысхаларын сырдатта, нэһилиэнньэ ыйытыыларыгар хоруйдаата. Кэпсэтии социальнай инфраструктураны саҥардыы, хаарбах дьиэлэртэн олохтоохтору көһөрүү, тырааныспар тиһигин, социальнай төлөбүрдэр, нэһилиэнньэлээх пууннары тупсарыы курдук тыын боппуруостары таарыйда.

Үгүс ыйытыы Дьокуускай куораттан, Алдан, Мииринэй, Ленскэй, Хаҥалас, Чурапчы уонна Нерюнгри оройуоннарыттан киирбитэ бэлиэтэннэ. Манна даҕатан эттэххэ, аҥаардас ыйытыы эрэ буолбакка, баҕа санаа, этии, махтал, эҕэрдэ элбэх буолла.   

Бу сырыыга быһа кэпсэтии аан маҥнайгытын сурдотылбааһынан доҕуһуолланна, онно Анастасия Лаптева, Оксана Кривогорницына, Ульяна Максимова үлэлээтилэр. Итиэннэ бастакытын МАХ мессенджер туһанылынна.