Ил Дархан иһинэн үлэлиир Урбааны сүрүннүүр сэбиэт мунньаҕа буолан ааста

Дьокуускайга Ил Дархан иһинэн үлэлиир Урбааны сүрүннүүр сэбиэт уочараттаах мунньаҕа бэрэссэдээтэл солбуйааччытын уонна президиуму талла, сыллааҕы былаанын торумнаата.

Саҥа талыллыбыт сэбиэккэ өрөспүүбүлүкэ урбаанньыттарыттан 60-тан тахса киһи киирбит. Ол эбэтэр киин куорат уонна бары оройуоннар бэрэстэбиитэллэрэ баар буолаллара ситиһиллибит. Онуоха туох баар уопсастыбаннай тэрилтэлэри, бары хайысханы хабарга дьулуспуттар. Холобур, тимир уустара, доруобуйаларын туругунан хааччахтаах урбаанньыттар, ону тэҥэ креативнай түмсүүлэр бэрэстэбиитэллэрэ эбиллэн биэрбиттэр. Бу иннинэ кинилэр суохтара. Бу туһунан “Вести Саха” иһитиннэрдэ. “Биһиги аныгы уонна кэм ирдэбилигэр эппиэттэһэр сэбиэти сүүмэрдииргэ дьулуһабыт” – диир эбит СӨ урбааҥҥа, атыыга-тутууга уонна туризмҥа миниистирэ Георгий Андреев.

Санатан эттэххэ, Урбааны сүрүннүүр сэбиэт дьоҕус уонна орто урбаан сайдыытын тыын суолталаах боппуруостарын быһаарыыга үлэлэһэр. Ону тэҥэ урбаан уонна былаас бииргэ уонна кэмигэр ыкса үлэлэһиилэрин ситиһэр аналлаах.