Ил Дархан Дьокуускай 400 сылыгар бэлэмнэнии туһунан

Ил Дархан бэлиэтииринэн, Дьокуускай үбүлүөйэ бүтүн Арассыыйа үрдүнэн үрдүк суолталаах. Арассыыйа хоту уонна уһук илин диэки өттүн сайыннарыыга Дьокуускай сүҥкэн оруолу оонньообута.

Үбүлүөйгэ бэлэмнэнии чэрчитинэн саҥа эбийиэктэри тутуу, ол иһигэр социальнай хайысхалаах тутуулар эмиэ, уулуссалары тупсарыы, хаарбах дьиэттэн дьону көһөрүү ыытыллар. Дойду бэрэсидьиэнинэн бигэргэммит Дьокуускай сайдыытын маастар-былаана 400 сыллаах үбүлүөйү бэлиэтээһини кытта ситимнэммитэ.

Инфраструктураны сайыннарыы үлэтин сэргэ историяны харыстыыр дьаһаллар ылыллыахтаахтар диэтэ Ил Дархан. Дьокуускай киин өттүгэр ыытыллыбыт археологическай хаһыылар бүтүн дойду наукатыгар улахан суолталаах арыйыылары оҥорбуттарын бэлиэтээтэ.

Айсен Николаев Троицкай таҥара дьиэтин, Реальнай училище уонна Прогимназия дьиэлэрин чөлүгэр түһэрии туһунан санаатын үллэһиннэ. Бу кэлэр сылларга “Кырдьаҕас куорат-2” бырайыак олоххо киирэрэ уолдьаспытын бэлиэтээтэ.

Маны тэҥэ Ил Дархан Дьокуускай бүддьүөтүгэр нолуоктан киирэр бырыһыаны 40-тан 50-ҥа диэри үрдэтэр тоҕоостооҕор болҕомтотун уурда. Нолуок киириитэ үрдээтэҕинэ, Дьокуускай сыллата 2,5 млрд солк ылыан сөп. Бу үп куораты сайыннарыыга туһуланыахтааҕын туһунан Олохтоох дьаһалтаны кытта кэпсэтии барбытын ахтан ааста.