Ил Дархан быһа эпииригэр киирбит үҥсүүлэр – куорат баһылыгын хонтуруолугар

Куорат баһылыга МАХ ханаалыгар иһитиннэрбитинэн, урукку өттүгэр хаарбах туруктаах дьиэлэртэн олохтоохтору көһөрүү уонна ОДьКХ боппуруостара инники күөҥҥэ турар эбит буоллахтарына, билигин онно уопсастыбаннай тырааныспар эбиллибит. Нэһилиэнньэ оптуобустар кирдээхтэрин, сылдьар арыттара уһунун, тохтобулларга маршруттар билиҥҥи схемалара суоҕун үҥсэр.

Бэлиэтээн эттэххэ, Ил Дархан быһа эпииригэр 1726 этииттэн 500-чэ ыйытыы киин куорат олохтоохторуттан киирбит.

Дмитрий Садовников этэринэн, иккис сытыы тиэмэ – сир уонна тутуу боппуруоһа, көҥүлэ суох тутуу дьиҥ кыһалҕаҕа кубулуйда.

Кини Муниципальнай инспекция управлениета мөлтөхтүк үлэлиирин, куораты эт атахтарынан сылдьан кэрийбэттэрин, кэһии тахсыбыта үҥсүү киирдэҕинэ эрэ биллэрин бэлиэтээтэ. Маныаха куорат баһылыга бүгүҥҥү туругунан итинник кэһиилэри суута суох түргэнник тохтотор мэхэньиисим суоҕун, барыта суут нөҥүө быһаарылларын, ол иһин сорох дьыала сылы-сыллаан уһаан хаалыан сөбүн ыйда. “Үлэни хат көрүөхпүт”, – диэтэ кини.

Маны таһынан Садовников уулуссалары сырдатыыга, салайар хампаанньалар үлэлэригэр уонна бэйдиэ сылдьар ыттарга сыһыаннаах үҥсүүлэри болҕомто киинигэр ылбыттарын иһитиннэрдэ. Хас биирдии хайысхаҕа туһааннаах сулууспаларга сорудахтар бэриллибиттэр.