Ил Дархан Анал этиитигэр — доруобуйа харыстабылын боппуруостара

Ахсынньы 23 күнүгэр Ил Дархан Ил Түмэҥҥэ туһаайбыт Анал этиитигэр доруобуйа харыстабылын эйгэтигэр сыһыаннаах хас да боппуруоһу таарыйда.

* «Өрөспүүбүлүкэбит оҕо төрөөһүнүнэн Уһук Илиҥҥэ 1-кы, Арассыыйаҕа 10-с миэстэҕэ сылдьар. Оҕо аҥаарын кэриэтэ элбэх оҕолоох ыалга төрүүр, маннык ыал билигин биһиэхэ 34,5 тыһ. тиийдэ»

* «Биэс сыл иһигэр оҥоһуллар телеконсультация ахсаана 3 төгүл улаатта – сылга 10 тыһ. 34 тыһ. диэри»

* «Икки сыл иһигэр пациеннар миэстэтигэр көрдөрүүлэрэ 60% улаатта, оттон миэстэтигэр эпэрээссийэни оҥоруу – 40%»

* «2026 сылга өрөспүүбүлүкэтээҕи биэдэмистибэлэр икки ардыларынааҕы бырагыраама үлэлээн саҕалыа. Сыала – хас биирдии оскуолаҕа доруобуйаны харыстыыр эйгэни тэрийии».

* «Бу сылга үгүс дьоҥҥо сүрүн кыһалҕанан чэпчэтиилээх эминэн хааччыйыы харгытааһына буолла. Бу сыалга-сорукка 2026 с. судаарыстыбаннай бүддьүөккэ 3,8 млрд солк. көрүлүннэ, бу ааһан эрэр сыллааҕар 1,2 млрд-нан элбэх.

Манна Бырабыыталыстыба кээмэйи кыччаппакка бигэтик, кэмигэр үбүлээһинин хааччыйара булгуччулаах. 2,6 млрд солк. көрүллүбүт санитарнай авиацияҕа эмиэ үбүлээһинин чааһыгар маннык сыһыан баар буолуохтаах».

* «СӨ Бырабыыталыстыбатыгар доруобуйа харыстабылыгар 2030 сылга диэри кэми хабар саҥа Регионнааҕы бырагырааманы ылыналларыгар сорудахтыыбын. Бу бырагыраамаҕа араас хайысханан чопчу миэрэлэр баар буолуохтаахтар».

Хаартыска: Ил Дархан телеграм-ханаалыттан