Иккис саҥа туалет көһөрүллүөҕэ

Бүгүн, от ыйын 21 күнүгэр, СӨ былыргы тутуулары харыстыыр управлениетын салайааччыта Николай Макаров бэйэтин МАХ-ханаалыгар Бүтүн Арассыыйатааҕы история уонна култуура пааматынньыктарын харыстыыр уопсастыба бэрэссэдээтэлэ Руслан Васильевтан Кырдьаҕас куоракка туруоруллубут уопсастыбаннай туалет «Биллиилээх судаарыстыбаннай уонна уопсастыбаннай диэйэтэл Максим Кирович Аммосов олорбут дьиэтэ» диэн архитектура пааматынньтыгын таһыгар туруоруллубутунан миэстэтигэр тиийэн, федеральнай сокуону кэһии түгэнэ баарын бэрэбиэркэлииргэ сорудахтаабытын туһунан иһитиннэрбитэ.

Хаартыскаҕа көстөрүн курдук, уопсастыбаннай туалет, чахчы, М.К. Аммосов олорбут дьиэтиттэн чугас туруоруллубут.

СӨ былыргы тутуулары харыстыыр управлениетын салайааччыта Николай Макаров:

– Бүгүн миэстэтигэр тиийэн көрөн кэллибит. Бэрэбиэркэ түмүгүнэн, туалет хапытаалынай тутуу буолбатаҕын быһыытынан, куорат Киин уокуругар эбийиэги «кыһыл сурааһынтан» таһааран биэрэр туһунан сурук бэлэмниибит. Оччотугар сокуону кэһии суох буолуоҕа.

Дьокуускай куорат территориятыгар уопсастыбаннай туалет биир сытыы кыһалҕа буолбута кистэл буолбатах. Дьыл хайа да кэмигэр улахан болуоссаттарга – Кыайыы болуоссата, Орджоникидзе болуоссата, Доҕордоһуу болуоссата, Ленин болуоссата – куорат, өрөспүүбүлүкэ таһымнаах дьоҕус да, бөдөҥ да тэрээһиннэр тиһигин быспакка ыытыллаллар. Манна мустар оҕотуттан эмэнигэр диэри дьон айылҕа быһыытынан кыһалҕаларын толунар чэпчэлэрэ төрдүттэн суоҕа, чахчы, аныгы үйэҕэ дьүөрэтэ суох сытыы кыһалҕа. Быйыл, дьэ, бу кыһалҕа «Главстрой» тэрилтэ көмөтүнэн, Кырдьаҕас куоракка турбут туалет оннун аахсыбатахха, быһаарыллан эрэр.

Афанасий Александров, «Главстрой» генеральнай дириэктэрин солбуйааччы:

– Куорат дьаһалтатын сакааһынан быйыл икки туалеты туруоруохтаахпытын туттардыбыт. Туалет диэн стационарнайа суох эбийиэк буоларын быһыытынан, сакаасчыт ханна баҕар көһөрөн, сыҕарытан биэрэр кыахтаах.   

Санатан эттэххэ, бу иннинэ уопсастыбаннай туалеттар Дьокуускайга Таалай күөл кытылыгар уонна Саха тыйаатырын кэннинэн эрэ бааллара. Сарсыарда 09:00 чаастан киэһээ 21:00 чааска диэри үлэлииллэр, төлөбүрдэрэ – 50 солк.