Икки туочукаттан сылтаан...

– Оҕолорбор биир кэлим босуобуйа оҥоттороору сайабылыанньа биэрбитим. Арай онтукпар эппиэт кэллэ. Оҕолоруҥ аҕаларын ааттарыгар сорох докумуоннарга Е буукуба турбут, ону Ё буукуба оҥоттор, үрдүгэр икки туочука баар буолуохтаах. АртЁмович, эйиэннэрэ Артемович диэннэр диэн. Онуоха дьэ мин субуота күммүн сиэртибэлээн МФЦ хонтуоратыгар тиийэн толуон ылан күн аҥаара кэриҥэ олордум. Ол күн эрдэттэн суруйтарыы суох этэ. Буолумуна, дьон үксэ үлэлиир буолан, субуотаҕа кэллэхтэрэ. Дьэ, уочараппын кэтэһэн чохоллон олоруу. Икки туочука инниттэн дьиэбин-уоппун хомуйбакка, оҕолорбор ас астаабакка, таҥас-сап сууйбакка, тура-олоро уочараппын кэтэстэҕим дии. Кэмниэ-кэнэҕэс ыҥырбыттарыгар үөрэ-көтө кэтэһиилээх “окуоскабар” тиийдим. Арай үлэһит кыыс докумуоннарбын көрөн, бэрийэн баран, “Госуслуги” киирэн оҕолоруҥ ааттарын сотторон баран хаттаан суруйан кэбис диэн бэрт дэбигистик быһааран кэбистэ. Баара-суоҕа мүнүүтэттэн эрэ ордук олордум. Онон, түргэнник да быһаарыллар боппуруоһу онон-манан эргитэн киһини эрэйдииллэр эбит”.

Чахчыта да оннук, ону бэйэбинэн билэбин. Ийэбит докумуоннарын оҥотторорго сорох сиргэ МАтрена, сорох сиргэ МОтрена диэн барбыт этэ, хата, икки туочуката суоҕа, А уонна О буукубалар кырдьык көлөһүммүтүн тохпуттара. Дьиҥэр, былыргы киһи, А эрэ О эрэ, дьиҥнээх аата МАтрена, Матырыас буоллаҕа, ону кэлин үөрэхтээхтэр МОтрена диэн суруйан буккууру таһаарбыттар этэ.

Итинник түбэлтэ кэлин элбэхтэ тахсыталыыр буолла. Холобур СардАна, СардААна, СаргылАна, СаргылААна, ТуйААра ТуЯра, КҮннэй, КЮннэй уо.д.а. Бэйэм да ааппын ылан көрдөххө, НаталЬя, сорохтор НаталИя дииллэр. Итинниккэ түбэспит киһи элбэх буолуохтаах. Эгэ, билигин, сахалыы аат ыал аайы баар, киһи аайы бэриллэр буолбутун кэннэ, дьэ, чахчы маахайданыы, буккуллуу үгүстүк тахсарын тустаахтар кэпсииллэр. Ол аайы күн аҥаара МФЦ-га олоруу, пааспаргын уларытыы, сүүрүү-көтүү, этэ да барбаккын.

Онтон, ааҕааччылар, эһиги итинниккэ түбэспиккит дуо?