Икки саҥа уһуйаан тутуллуо

Чуолаан, саҥа уһуйаан 145-с кыбартаалга Клара Цеткин уулуссаҕа баар “Параллель” олорор комплекска тутуллар. Эбийиэги 2027 сылга киллэрэри былаанныыллар. Бырайыак оскуола иннинээҕи саастаах оҕолорго эбии миэстэни арыйыаҕа уонна куорат бу өттүгэр үөрэх өҥөтүн туһаныыны тупсарыаҕа.

Маны таһынан, “Звезднай” түөлбэҕэ 315 миэстэлээх улахан оҕо саадын тутуута бара турар. Бырайыак социальнай инфраструктураны сайыннарыы бырагырааматын чэрчитинэн олоххо киирэр. Үс этээстээх дьиэ уопсай иэнэ 5400 квадратнай миэтэрэттэн тахса, тутуу бэлэмэ 40% кэриҥэ буолла. Быйылгы сыл бүтүүтүгэр түмүктэнэрэ былааннанар. Манна эбии бу түөлбэҕэ тэҥинэн 990 миэстэлээх оскуола тутуута ыытылла турар.

Үөрэх кыһата Дьокуускай соҕуруу өттүгэр урут аһыллыбыт 39 уонна 40 №-дээх оскуолалар кэннилэриттэн маннык кээмэйдээх үһүс эбийиэк буолуоҕа уонна бу түөлбэни өссө сайыннаран аныгы үөрэх инфраструктуратынан хааччыйыаҕа.

Өрөспүүбүлүкэҕэ 2020 сылтан 61 оскуола уонна 37 оҕо уһуйаана аһылынна, 100-тэн тахса үөрэх эбийиэгэр хапытаалынай саҥардыы үлэтин ыытта, ол иһигэр Арктика улуустарыгар. Бу үлэ көмөтүнэн билигин 14 тыһыынчаттан тахса оҕо аныгы уонна табыгастаах усулуобуйаҕа үөрэнэр кыахтанна. Саҥа эбийиэктэри олоххо киллэрии Уһук Илин национальнай бырайыактарын уонна сайдыы бырагыраамаларын, ону тэҥэ Дьокуускай уонна Нерюнгри генеральнай былааннарын чэрчилэринэн салҕанар.