Игорь Юргин куорат лааҕырдарыгар ыалдьыттаата

Арассыыйа үөрэҕириигэ министиэристибэтин иитии, эбии үөрэхтээһин уонна оҕо сынньалаҥын эйгэтигэр судаарыстыбаннай политика департаменын дириэктэрэ, Арассыыйа Дьоруойа Игорь Юргин Дьокуускайга кэлэ сылдьан, оҕо сайыҥҥы сынньалаҥын тэрилтэлэригэр ыалдьыттаата.

Игорь Васильевич оробуочай сырыытыгар куорат таһынааҕы «Энергетик»,  «Радуга» уонна «Спутник» лааҕырдары көрдө-иһиттэ. Кинини үөрэх уонна билим миниистирэ Нюргуна Соколова «Сосновый бор» оҕо сынньалаҥын уонна чэбдигириитин киинин дириэктэрэ Варвара Васильева арыаллаатылар.

Игорь Васильевич лааҕырдар материальнай-тэхиньиичэскэй туруктарыгар улахан болҕомтотун уурда. Кини оҕо тупсаҕай сынньалаҥын тэрийии дьоһун суолталааҕын бэлиэтээтэ. 

Арассыыйа Дьоруойа саҥардыллыбыт «Спутник» лааҕырга сылдьан баран, телеграм-ханаалыгар санаатын бу курдук үллэһиннэ:

«Дойду Бэрэсидьиэнэ Владимир Путин көҕүлээһининэн оҕо сынньалаҥын инфраструктуратын сайыннарыыга туһуламмыт судаарыстыбаннай бырагыраама көдьүүстээҕэр итэҕэйдим. Бырагыраама иитинэн тутуллубут түөрт аныгылыы тупсаҕай куорпус лааҕыр «мөссүөнүн» биллэ уларыппыт. «Спутник» туруоруллубут соругу олоххо ситиһиилээхтик киллэрии үтүө холобура буолла».

  Хаартыска: Игорь Юргин телеграм-ханаала