Игорь Юргин федеральнай министиэристибэҕэ үлэҕэ барыаҕа

Арассыыйа үөрэҕин миниистирэ Сергей Кравцов Саха сиригэр кэлэ сылдьан Ил Дархан Айсен Николаевы кытта көрсүһүүтүгэр Арассыыйа Дьоруойа, «Дьоруойдар кэмнэрэ» бырагыраама кыттыылааҕа, СӨ ыччат миниистирин э.т. Игорь Юргины Арассыыйа үөрэҕин министиэристибэтигэр департамент салайааччытынан үлэҕэ ыҥырда. 

Игорь Юргин Сергей Сергеевичка уонна Айсен Сергеевичка үрдүк эрэллэригэр махталын биллэрдэ. «Бу этии миэхэ үрдүк чиэс уонна эппиэтинэс. Дойдубут кэскилин туһугар кылааппын киллэрэргэ бэлэммин», – диэтэ кини.

Штурмовой этэрээт хамандыыра майор Игорь Юргин Алдан оройуонун Аллараа Кураанах бөһүөлэгиттэн төрүттээх. Былырыын дойду баһылыга Владимир Путин ыйааҕынан үрдүкү судаарыстыбаннай наҕарааданан – Арассыыйа Дьоруойун уордьанынан наҕараадаламмыта. Игорь Юргин маны сэргэ икки «Эр санаа» уордьан, «Хорсунун иһин» мэтээл о.д.а. наҕараадалар кавалердара.
Анал байыаннай дьайыыга 2022 сылтан, саҕаланыаҕыттан кыттыыны ылбыта. Бииргэ сулууспалыыр бойобуой доҕотторун кытта боевиктар алта элитнэй бөлөхтөрүн кыргыбыттара. «Дьоруойдар кэмнэрэ» бырагырааманан Игорь Юргин Саха Өрөспүүбүлүкэтин бырабыыталыстыбатыгар стажировканы ааспыта, ыччат миниистирин э.т. анаммыта. Настаабынньыга – Саха Өрөспүүбүлүкэтин Ил Дархана Айсен Николаев, диэн иһитиннэрэр Ил Дархан уонна Бырабыыталыстыба пресс-сулууспата.

Хаартыска: Андрей Сорокин, СИА