«Идэтигэр бастыҥ» федеральнай куонкурус тутаах түһүмэҕэр Саха сирин аатын «Сахатранснефтегаз» сыбаарсыга көмүскүүр

Федеральнай күрэх Пермьҥэ буола турар. Идэтигэр бастыҥы быһаарар куонкурус “Сыбаарсык” диэн номинациятыгар кыттар.  Бу үрдүк ааты ылар туһугар дойду уонтан тахса эрэгийиэниттэн 58 маастар талыллан кэлэн, күөн көрсөр.

Николай – «Сахатранснефтегаз» национальнай гаас хампаанньатын гааһы тарҕатар ситимин управлениетын тутар учаастагар электрогазосварщиыгынан үлэлиир. Бу тэрилтэҕэ 2019 сылга үлэҕэ киирбитэ. Кинини кытта биир идэлээҕэ, гааһы тарҕатар ситимин управлениетын кылаабынай сыбаарсыга Евгений Валерьевич Сидоров барыста.

Күрэх кыттааччыларын Пермьнээҕи Н.Г. Славянов аатын сүгэр политехническай колледжка  
тургутан көрүөхтэрэ. Бүгүн кинилэр үс чаас иһигэр чертежка уруһуйдаммыт деталы үүт-маас үтүктэн, дуҕалыы сыбаарка ньыматынан, сыбааркалаан, оҥорон таһаарар сорудахтаахтар. Онуоха туһунан ирдэбиллэр, быраабылалар бааллар, ону чопчу тутуһан оҥоруохтаахтар.

Ону таһынан кыттаачыларга анаммыт маастар-кылаастарга, дьыалабыай оонньууларга уонна куонкурс партнердара тэрийэр кэмпириэнсийэлэригэр сылдьыахтара.

Куонкурска кыттааччы үлэлиир тэрилтэтин пресс-сулууспата Николайтан кэмэнтээрий ылбытын үллэстэр. “Бүтүн өрөспүүбүлүкэ уонна хампаанньам аатыттан кыттарым миэхэ сүдү эппиэтинэһи сүктэрэрин өйдүүбүн.  Мин Перьмҥэ идэҕэ таһыммын эрэ көрдөрө кэлбэтим, ону сэргэ атын эрэгийиэннэргэ үлэлиир биир идэлээхтэрим уопуттарын билсиэм, үөрэниэм. Туох баар кыһамньыбын, сатабылбын ууран туран, төрөөбүт-үөскээбит Сахам сирин  уонна “Сахатранснефтегаз” хампаанньам аатын чиэстээхтик көмүскүүргэ дьулуһуом” – диэбит Николай Николаевич.

Бу, Бүтүн Арассыыйатааҕы “Үлэтигэр бастыҥ” идэ маастарыстыбатын көрдөрөр дойду таһымнаах куонкурус “Каадырдар” национальнай бырайыак уонна “Үлэ киһитэ” федеральнай бырайыактар чэрчилэринэн, ыытыларын санатар тоҕоостоох.  

Николайдаахха ситиһиини, кынаттаах кыайыыны баҕарыаҕыҥ!