Ичээн Алгыстаах Арчыына: «Оҕолорун сүтэрбит ийэлэр сүрэхтэрэ ытыырын өйдүүбүн...»
Манна бааллар: көрбүөччүлэр, ичээннэр, удаҕаннар, билгэһиттэр, алгысчыттар, уйулҕаһыттар, эмчиттэр, арчыһыттар. Айылҕалаах дьон интервьюга улгумнук сөбүлэспэттэр, буолаары буолан видеоҕа уһуллартан, хаартыскаҕа түһэртэн тута батыналлар. «Сылдьыбыт сыыһы булар, көрдөөбүт көһүйэ көмүһү булар» дииллэр.
Ичээн Алгыстаах Арчыына соторутааҕыта эрэ анал байыаннай дьайыы буола турар сирдэриттэн үлэлээн кэлбит. «Билигин уолаттарбыт Гуляйполеҕа сылдьаллар. Санаалара күүстээх», – диэн кэпсээннээх көрүстэ. Кини онно сылдьар уолаттарбытын алгыстыыр, дүҥүрүнэн күрүөлүүр эбит. Бэйэтэ этэринэн, аан бастаан иллэрээ сыллааҕыта этитиинэн барбыт.
Аны туран, сураҕа суох сүппүт уолаттар кырамталарын көрдүүргэ көмөлөһөр. Бэл диэтэр, Хабаровскай, Новосибирскай, Бурятия, Владивосток диэкиттэн кыһалҕалаахтар сибээскэ тахсар буолбуттар.
– Оҕолорун сүтэрбит ийэлэр сүрэхтэрэ ытыырын өйдүүбүн. Дьиҥнээх уот сэрии буола турар сиригэр сылдьыбаппын. Дьиҥинэн, миигин онно киллэрэллэрэ буоллар, «манна сытар» диэн этиэхпин сөп. Сорох уолаттар 2022-2023 сыллартан кэлэ иликтэр, – диир.
Алгыстаах Арчыыналыын блиц-интервьюну ТГ-ханаалбытыгар киирэн сиһилии көрүҥ.
Сонуннар
Ордук ааҕаллар
