Хоту улуустарга миэстэтигэр тиийэн доруобуйа туругун көрөллөр

Саҥа сыл бастакы ыйыттан, о.э. тохсунньу 23 күнүттэн саҕалаан Анаабыр улууһугар Дьокуускайтан тиийэн элбэх хайысхалаах оҕо быраастарын биригээдэтэ үлэлээтэ. Бастатан туран, кинилэр доруобуйаларынан хааччахтаах уонна учуокка турар оҕолорго болҕомтолорун уураллар.

Быраастар дьоҕус биригээдэлэрэ балтараа нэдиэлэ устата оҕо аймах доруобуйатын туругун көрдүлэр-иһиттилэр, сүбэ-ама биэрдилэр. Бастаан Үрүҥ Хайа нэһилиэгэр биэс күн устата уопсайа 203 оҕо доруобуйатын көрдүлэр.

Бу туһунан педиатр быраас Анжелика Иннокентьевна Матвеева билиһиннэрдэ:

– Биһиги доруобуйа уонна медицинскэй профилактика өрөспүүбүлүкэтээҕи уопсастыбаннай кииниттэн ананан үлэлиибит. Ол иһигэр «Региональный центр детских мобильных бригад» диэн хайысхалаахпыт. Уопсайа биригээдэбит 13 киһиттэн турар — харах бырааһа, ЛОР, эндокринолог, кардиолог, гинеколог, уролог, ортопед, психиатр, педиатр, узист, невролог уонна икки орто медперсонал. 14-тэриттэн үөһээ саастаах оҕолортон гепатит уонна эндокринолог көрдөрүүтүнэн гормон анаалыстарын ылабыт.

Тохсунньу 24 чыыһылатыттан саҕалаан оскуоланан уонна уһуйаанынан сылдьан үлэбитин саҕалаабыппыт. 

Чинчийиигэ наадалаах бары тэрилинэн толору хааччыллыылаахпыт. Бүгүҥҥү туругунан 380 оҕо көрдөрүннэ. Оҕолорго барыларыгар сүбэ-ама биэрэбит, эмп аныыбыт, наадыйар оҕону куорат балыыһаларыгар ыытабыт.

Санатар буоллахха, «Өрөспүүбүлкэтээҕи мобильнай биригээдэлэр кииннэрэ» бырайыак Арассыыйа бэрэсидьиэнэ Владимир Путин көҕүлээһининэн, Саха Өрөспүүбүлүкэтин Ил Дархана Айсен Николаев өйөбүлүнэн үлэлиир.  Сүрүн сыала ыраах хоту сиргэ олохтоох дьон доруобуйаларыгар болҕомто ууруу, хаачыстыбалаах эмтээһин буолар.

2024 сылга доруобуйа уонна медицинскэй профилактика өрөспүүбүлүкэтээҕи уопсастыбаннай киинин быраастара Арктика 89 нэһилиэгин хаппыттара. Оттон быйылгы саҥа сылларын ыраах Анаабыр улууһуттан  саҕалаатылар.