Хос эhэм бойобуой наҕараадалара

Сэрии толоонугар уонна тыылга төрөөбүт дойдубутун өстөөхтөн көмүскээбит аҕа дьоммут үрдүк ааттарыгар сүгүрүйэр, Ийэ сир туһугар ыар кэмҥэ биир ньыгыл кэккэҕэ түмсүбүт улуу дойдубут норуоттарынан киэн туттар ытык иэспит.
Хос эhэм Татаринов Иннокентий Афанасьевич бойобуой олоҕун туоhулара – наҕараадалара.
Киhиэхэ барытыгар саамай күндү бэлэх – Эйэ. Кыайыы күнэ – сэрии толоонугар уонна тыылга төрөөбүт дойдубутун өстөөхтөн көмүскээбит аҕа дьоммут үрдүк ааттарыгар сүгүрүйэр, кинилэр ааттарынан киэн туттар ытык күммүт.
1941-1945 сс. ааспыт Аҕа дойду Улуу сэриитэ элбэх сүтүктээх этэ, уонна сэбиэскэй норуот аҕалбыт Кыайыы өрөгөйүнэн түмүктэммитэ. Сэрии толоонугар охтубуттар, сураҕа суох сүппүттэр сырдык өйдөбүллэрэ умнуллубат, кѳлүѳнэттэн кѳлүѳнэҕэ бэриллэн иhэр.
Саха сирин 60 тыһыынчаттан тахса чулуу ыччаттара Аҕа дойду уоттаах сэриитигэр кыттан, Москва, Ленинград, Сталинград куораттары көмүскээбиттэрэ, Курскай Дугаҕа, Старай Руссаҕа, Арҕаа фроҥҥа сэриилэспиттэрэ, Берлины ылсыбыттара. Европа дойдуларын фашистартан босхолооһуҥҥа, милитаристскай Японияны үлтүрүтүүгэ кыттыспыттара. Сэриигэ барбыттартан 40 тыһыынча кэриҥэ биир дойдулаахпыт ахтылҕаннаах Сахаларын сиригэр төннүбэтэхтэрэ.
Өрөспүүбүлүкэ дьоно-сэргэтэ “Барыта – фронт туһугар! Барыта – Кыайыы туһугар!” диэн күүстээх үлэҕэ туруммута, тоҥору-хатары, хоргуйары аахсыбакка, хара көлөһүнүнэн Дойду көмүскэлигэр уу харчынан, түүлээҕинэн, көмүһүнэн, аһынан-үөлүнэн, итии таҥаһынан, сэрии сэбинэн-сэбиргэлинэн сөҕүмэр көмөнү оҥорбута. Саха сирин олохтоохторо Арҕаа фроҥҥа икки танковай колоннаны, бойобуой сөмөлүөттэр эскадрильяларын оҥотторон ыыппыттара. Мин хос эhэм Татаринов Иннокентий Афанасьевич милитаристскай Японияны үлтүрүтүүгэ сылдьыбыта.
Бүгүн хос эһэм бойобуой наҕараадаларын “Киин куорат” хаһыат ааҕааччыларыгар билиһиннэриэхпин, кэпсиэхпин баҕарабын.
1. “Фронтовик” мэтээл. 1941-1945 сс.
2. “Японияны кыайыы иһин” мэтээл. №363495, 1947 с. от ыйын 24 күнэ.
3. “Сэбиэскэй Аармыйа 30 сыла” мэтээл. 1948 с. алтынньы 17 күнэ.
4. “1941-45 сс. Аҕа дойду Улуу сэриитигэр Кыайыы 20 сыла” мэтээл. 1968 сыл сэтинньи 6 күнэ.
5. “1941-45 сс. Аҕа дойду Улуу сэриитигэр Кыайыы 25 сыла”.
6. “Килбиэннээх үлэ иһин” мэтээл, 1970 с. муус устар 10 күнэ.
7. “1941-45 сс. Аҕа дойду Улуу сэриитигэр Кыайыы 30 сыла” мэтээл, 1975 с. бэс ыйын 22 күнэ.
8. Аҕа дойду сэриитин уордьана, № 893977, 1985 с.
9. “1941-45 сс. Аҕа дойду Улуу сэриитигэр Кыайыы 40 сыла” мэтээл, 1985 с. ыам ыйын 9 күнэ.
10. “1941-45 сс. Аҕа дойду Улуу сэриитигэр Кыайыы 50 сыла” мэтээл, 1995 сыл кулун тутар 22 күнэ.
11. “ССРС Сэбилэниилээх күүстэрин 80 сыла” мэтээл.
12. “Сэбиэскэй сойуус маршала Жуков/ Сэбиэскэй норуот Улуу уола” мэтээл, № 0313529, 1996 с. олунньу 19 күнэ.
13. “1941-45 сс. Аҕа дойду Улуу сэриитигэр Кыайыы 60 сыла” мэтээл, 2005 с. олунньу 25 күнэ.
14. “1941-45 сс. Аҕа дойду Улуу сэриитигэр Кыайыы 65 сыла” мэтээл, 2010 с.
Хаартыскалар: Артём Гаврильев ыыппытыттан
Сонуннар
Ордук ааҕаллар


