Хортуоппуй үүннэрэр фермер Россельхозбаан Гранын ылла

Мэҥэ Хаҥалас хортуоппуй үүннэриитинэн дьарыктанар фермерэ Иннокентий Борисов Россельхозбаан «Грант АгроБизнес» бырайыагын кыайыылааҕынан тахсан, 300 тыһ. солк. кээмэйдээх грант хаһаайына буолла, диэн СӨ тыа хаһаайыстыбатын министиэристибэ иһитиннэрэр.
Иннокентий Борисов Мэҥэ Хаҥалас Ороссолуодатыгар аймахтарын кытта «Быйаҥ» бааһынай хаһаайыстыбанан хортуоппуй үүннэриитинэн дьарыктаммыттара уонча сыл буолбут. Хаһаайыстыба 10-ча гектар сиртэн сылга ортотунан 70 туонна хортуоппуйу ылар. 
«Фермер оскуолата» бырайыак туһунан былырыын бастакы түһүмэххэ үөрэммиттэртэн истибитим. Кырдьыгынан эттэххэ, кыайыылаах тахсыам диэн өйгө да суоҕа. Үөрэх чэрчитинэн атын хаһаайыстыбаларга сылдьыыны ордук сөбүлээбитим», – диэн санаатын үллэстэр грант хаһаайына.
«Иннокентий Борисов биисинэс-былаана бэлэм биисинэс-бырайыак – сиэмэттэн саҕалаан, ыһыы иэнэ, батарыы, барыс кээмэйэ барыта учуоттаммыт. Бырайыак ааптара бу үлэни иһиттэн билэрэ көстөр», – диэбит «Грант Агробизнес» куонкурус хамыыһыйатын чилиэнэ Василий Тимофеев.
Санатар буоллахха. Россельхозбаан «Фермер оскуолата» бырайыага Саха сиригэр 2023 сылга саҕаламмыт. Онон, Арассыыйа атын регионнарыгар ахсыс үөрэх ыытыллыбыт буоллаҕына, Саха сиригэр билиҥҥитэ икки оскуола буолан ааста. 
Куонкурус кыттыылаахтара үс ый устата «Растениеводство» уонна «Скотоводство» хайысхаларынан анал үөрэҕи ааһан баран, бэйэлэрин биисинэс-былааннарын суруйан, Россельхозбаан граныгар кытталлар.