Хортуоппуй иһин... ыстараап

Хортуоппуйу үүннэрии иһин ыстараап суох, оттон атыылааһын иһин эппиэтинэс уонна ыстараап көрүллэр.

«Даачалаахтар хортуоппуйу бэйэлэрин эрэ наадаларыгар, салгыы атыылаабакка эрэ үүннэрэр буоллахтарына, ханнык да ыстараап суох», — диэн Г.В. Плеханов аатынан РЭУ судаарыстыбаннай уонна муниципальнай үп кафедратын доцена Ольга Леонова быһаарда.

Хомуурун бэйэтин атыылыан баҕарар хаһаайын анал дьарыктанар дьонтон сертификацияламмыт сиэмэлэри эрэ туһаныахтаах — маннык түгэҥҥэ сиэмэ хортуоппуйу эбэтэр чааһынай дьонтон атыыласпыт сиэмэлэри олордуллуо суохтаах. Маны тэҥэ ИП быһыытынан регистрацияланыахтаах, диэн «Прайм» суруйар. Бу быраабылалары кэһии иһин накаастабыл көрүллэр.

РФ Административнай буруйу оҥоруу кодексатын 10.12 ыстатыйатынан («Сиэмэлэри атыылааһын быраабылатын кэһии») гражданнарга 300-тэн 500 солкуобайга диэри ыстараап, оттон 14.1 ыстатыйанан («Регистрацията суох сокуоннайа суох урбаанынан дьарык») — 500-тэн 2000 солкуобайга диэри.