Хортуоппуй 57 бырыһыана хомулунна

Олоҕурбут үгэс быһыытынан, балаҕан ыйын саҕаланыытыттан өрөспүүбүлүкэ хортуоппуй үүннэрэр хаһаайыстыбалара, биирдиилээн дьон күүтүүлээх үүнүүлэрин хомуйан саҕалаабыттара. Олохтоох тыа хаһаайыстыбатын министиэристибэтин чахчытынан, күн бүгүн 3 827,4 гаалаах бааһынаттан 41 143,9 туонна хомуллубут. Бу былаан 54%-гар тэҥнэһэр. Бары көрүҥ хаһаайыстыбалар быйыл холбоон-илбээн 76 тыһ. туоннаны ыларга суоттаналлар. Санатан эттэххэ, иккис килиэп тэҥэ суолталаах хортуоппуй быйыл 5 821,8 гааҕа ыһыллан турар. Билиҥҥи туругунан гааттан, ортотунан, 107,5 ц ылыллар.

Дьокуускай Бааһынай ырыынагар хортуоппуй сыаната билиҥҥитэ төһө-хачча буолан турарый? Олохтоох хортуоппуй араас суорда атыыланар. Быһаарсыбат дьон судургутук ааттыырбытынан        “кыһыл” да¸ “маҥан” да дэлэччи баар.  Кээмэйинэн наардаан атыылааччы элбэх. Кыра кээмэйдээх кыһыл хортуоппуй киилэтин муҥутуур чэпчэкитик – 80 солк. булуохха сөп. Тулагы хортуоппуйа этэ. Дьэ, ол кэнниттэн 100 -150 солк. диэри халбаҥныыр. Бу – кыра, орто кээмэйдээх киилэлиинэн атыы сыаната. Улахан кээмэйдээх итинтэн арыый үрдүк буолар, ортотунан, 180 солк. диэххэ сөп. Сотору куулунан атыы хотоойутук барыа турдаҕа. Атыыга да аҕалааччы элбиэ, оччотугар сыана эмиэ уларыйар. Үгэс быһыытынан, чэпчээччи. Быйыл, дьэ, хайдах буолар? Диисэл, бэнсиин сыаналанан, олохтоох оҥорон таһаарааччылар ночоотторун сабынар, дьоннорун хамнастыыр туһугар сыананы түһэримиэхтэрин сөп. Туһугар кыһалҕа буоллаҕа. Иккис өттүттэн, кыһыннары харайар ыскылаата суохтар, батара охсоору, күрэстэһии бэрээдэгинэн сыананы түһэриэхтэрин эмиэ сөп.