Хомуур күрэх – Бүлүүгэ

Бүлүү кыраныыссата бүрүллэн турар былытынан уонна күһүҥҥү буор ардаҕынан көрүстэ. Мөлтөһүөр буолбут суол-иис устун улахан хараабыл курдук Кытай массыынатын дохсун айана ууну-хаары икки өттүнэн ыһан, хайалаах сирдэринэн экстрими санатта. Кырдьаҕас Бүлүү куоракка ити курдук хонукпутугар тиийдибит.

Уһун уонна дохсун ардахтан куорат кумах уулуссата кытта алдьаммыкка дылы. Сарсын манна «Хомуур күрэҕи» аһаҕас халлаан анныгар хайдах ыытарбытын санаан, кыратык мунчааран ыллыбыт эрээри, интэриниэт ардаҕы мэлдьэһэригэр эрэнэргэ дылыбыт.

Сарсыарда эрдэттэн педколледж устудьуоннарын кытта көрсүһүүбүт тохтообутун истэммит хомойдубут эрээри, балаһыанньабыт начаас икки ардыгар быһаарылынна.

Бүлүү куорат күнүн чэрчитинэн экстремал марафонец, СӨ бочуоттаах тутааччыта Владимир Петрович Емельянов 2010 сылтан Саха сиригэр ыытар «Хомуур күрэх» оонньуутун оскуолаҕа ыытар буоллубут.

Бүлүү улууһун историятыгар бу бастакы күрэх! Биһигини, «Выпуск-85» түмсүүнү, манна Бүлүү куорат спорка управлениета Үөһээ Бүлүүгэ выпустар бэстибээллэригэр ыыппыт күрэхтэһиибитин көрөн ыҥырбыта.

Сарсыарда саҥа күммүт бэҕэһээҥҥи ардаҕын мэлдьэһэн көрүстэ. Күлүмнэс күн арыалынан сарсыарда 09.00 чааска Сэбиэскэй Сойуус Дьоруойа Николай Степанов аатын сүгэр 3 №-дээх оскуолаҕа кэллибит. Үргүлдьү 2-с кылаас физкультуратын уруогар киирэн, оҕолорго күрэх быраабылатын быһааран, тутатына көбүөргэ бииртэн биир эдэр спортсменнарбытын ааптар, кылаабынай судьуйа Владимир Емельянов ыҥыртаан барда.

Оҕолор көрдөрүүлэрэ тутатына компьютерга киллэриллэн, бастыҥнар быһаарыллан истилэр уонна спорт управлениетын, «Хомуур күрэх» бырабылыанньатын, «Выпуск-85» түмсүү бэчээттэрдээх сертификаттар туттарылыннылар. Биир кэскиллээх дьыаланан бу оскуола инвентарь атыылаһыыта буолла. Балтараа чаас иһигэр иккис уонна ахсыс кылаас үөрэнээччилэрэ «Хомуур күрэххэ» бастакы холонуулара итинник ааста.

Күрэхтэһии тыына барыбытын собуоттаан, 11.00 чаастан аны Набережнайга куорат олохтоохторугар тэрийэргэ сүбэлэстибит. Манна биһигини эмиэ спорт управлениетын үлэһитэ Галина Федорова көрүстэ. Оҕолорго уонна улахан дьоҥҥо тус-туһунан кээмэйдээх оонньуу хонуулара тэлгэтилиннилэр. 50 устуука мас кубиктаах дьааһыктар миэстэлэрин буллулар. Спортсмен бириэмэтин көрдөрөр электроннай табло холбонно. Түмүк тахсарын күүтэн, грамоталар, кубоктар судьуйа остуолугар кэчигирэстилэр.

Оҕолор күрэхтэригэр Бүлүү начаалынай оскуолатын үөрэнээччилэрэ күргүөмүнэн кэлэн кытыннылар. Манна волонтер быһыытынан «Бүлүү-85» көмөлөстө.

Бииртэн биир күрэхтэһиэн баҕалаах быыһа суох түргэн, сымса буолалларын көрдөрөллөр.

Оҕолорго саамай кыра кыттааччы 3 саастаах уолчаан буолла. Бэрт дьаныһан туран сорунуулаахтык 50 кубигы дьааһыкка таба угара көрөөччү ытыһын тыаһынан доҕуһуолланна.

Оҕолор күрэхтэрин көрөн, аны улахан дьон суруйтаран киирэн бардылар.  Устудьуоннартан саҕалаан, 70 саастаах ытык кырдьаҕаска диэри кыттыы буолла. Икки чаас устата түргэн туттуу, сымса буолуу, булугас өй, ону таһынан илии, атах, былчыҥ, харах бүтүннүү үлэлээн, сылайыы да буолла эрээри, хас биирдии киһи сааһыттан тутулуга суох күрэхтэһиэн сөптөөҕө дакаастанна.

Салгыы күнүс 15.00 чааска Оҕо дьиэтигэр (детдом) кэллибит. Манна 4 киһилээх хамаанданан уонна биирдиилээн бастыыр иһин күрэхтэһии олус күүрүүлээхтик ааста. Оҕолор бары сөбүлээн хастыыта да бэйэлэрин тургутан көрдүлэр.

Түмүгэр кыайыылаахтар ааптар уонна кылаабынай судьуйа Владимир Емельянов илиититтэн – мэтээл, бастыҥ көрдөрүүлээхтэр Кубок туттулар.

Бу курдук Бүлүү улууһугар ыытыллыбыт «Хомуур күрэх» уопсайа 97 кыттааччыны түмтэ.

Ааптарыскай көмүскэллээх күрэх инвентара атыыланна, салгыы сайыннарыыга кэпсэтиилэр ыытылыннылар.

Дьэ маннык Бүлүү эбэбит биэрэгэ сылаас ытыһыгар түһэрэн, элбэх дьиэҕэ «Хомуур күрэх» диэн саҥа сүүрээни киллэрдэ. Бэҕэһээҥҥи ардаҕын мэлдьэспит күн сыралҕаныгар тиритэ-хорута күрэхтэһиилэр буоллулар!

«Киин куорат» нөҥүө «Хомуур күрэх»  бырабылыанньатын аатыттан Бүлүү куорат спорка управлениетыгар (начаалынньык Федоров Степан Семёнович) уонна 3 №-дээх оскуола (Воронова Сардана Мироновна), Оҕо дьиэтин кэлэктииптэригэр, үөлээннээхтэрибитигэр «Бүлүү-85» түмсүүгэ махталбытын тириэрдэбит.