Хомунаалынай өҥө сыаната алтынньыттан үрдүүр

Холобур, Ставрополье кыраайыгар – 22%-ҥа тиийэ үрдүө, Москубаҕа – 15%, Хакасияҕа уонна Чукоткаҕа – 8-тыы бырыһыан. Оттон биһиэхэ?

РФ бырабыыталыстыбатын уонна СӨ Госкомцен чахчыларынан, Саха сиригэр хомунаалынай өҥө төлөбүрэ, ортотунан, 15,0%-нан ыарыыр. Бу – хомойуох иһин, Уһук Илиҥҥэ саамай үрдүк көрдөрүү.

Көрүҥнэринэн араарар буоллахха, кытаанах бөҕү тиэйии +31% (!) үрдүүр, итии уу иһин төлөбүр –  +18%, тымныы уу киэнэ –  +15%. Төрүкү да сыаналаах сылааһынан хааччыйыы өҥөтө – +14%, уот төлөбүрэ – +10,7%, гаас сыаната –  +8,6%.  Этэргэ дылы, олорбуппут сыччах. Алтынньытааҕы төлөбүр кыбытаансыйатын сэтинньигэ тутан, санаабыт лаппа түһэр буолуохтаах.

Арай бу биир сонун ол хомолтону – туһааннаах улуустар уотунан сылытынар олохтоохторугар – арыый да буоллар намыратара эбитэ дуу?

Ол эбэтэр, балаҕан ыйын 1 күнүгэр Саха сиригэр 03.07.2026 тахсыбыт СӨ "О внесении изменений в Закон Республики Саха (Якутия) "О льготных тарифах на сжиженный газ, электрическую и тепловую энергию (мощность), водоснабжение и водоотведение" диэн 579-VII №-дээх 2953-З сокуон олоххо киирбитэ.  Онно электро-уотунан сылытыныыга чэпчэтиилээх тарыып кэҥиирин туһунан этиллэр.

Ол эбэтэр, уотунан сылытыллар дьиэлээх дьоҥҥо көрүллэр чэпчэтиилээх тарыып бастакы диапазону туһанааччыларга эрэ буолбакка, иккис диапозоҥҥа хапсааччыларга эмиэ дьайар буолар. Маннык өйөбүл миэрэтэ гидроэлектростанциялар үлэлиир суоналарыгар олорор уонна уотунан эрэ сылытынар кыахтаах гражданнарга туһуланар.

Ол да чэпчэтии сылы эргиччи дьайбат, халлаан муҥутаан тымныйар кэмигэр –– сэтинньиттэн олунньуну ааҕан туран – эрэ көрүллэр.

Санатан эттэххэ, бастакы диапазоҥҥа 7020 кВт·ч диэри уоту туһанааччылар киирсэллэр. Иккис диапазон –7021-тэн саҕалаан, 10 800 кВт·ч диэри туһанааччыларга. Оттон үһүс диапазоҥҥа 10 801 кВт·ч тахсаны туһанааччылар киирэллэр.

Онон олорбуппут сыччах, алтынньыбыт да чугаһаата.