Хомунаалынай иэс иһин массыынаҕын былдьыахтарын, омук сиригэр таһаарымыахтарын сөп

Хомунаалынай төлөбүргэ иэс пени ааҕыллыытын таһынан атын кутталы эмиэ үөскэтэр. Иэс иһин салайар хампаанньа эйигин суукка биэриэн, онтон суут бириистэптэрэ баайгын-дуолгун былдьыахтарын сөп. Дьиэ-уот уонна хомунаалынай хаһаайыстыба исписэлииһэ Дмитрий Бондарь14 RU сайтка ол туһунан ырыппытын таһаарабыт.

“Хомунаалынай иэс үөскээтэҕинэ, салайар хампаанньа бастаан суут уурааҕын ылыан сөп. Иэстээх киһи ону 10 күн иһигэр утарар бырааптаах. Бу кэннэ эйигин суукка биэрэн, дьыаланы кыайдахтарына, исполнительнай докумуон суут бириистэптэригэр тиийиэн сөп. Кинилэр эн дохуоккуттан иэһи хомуйа сатыахтара. Сокуон быһыытынан, нолуок ааҕыытын кэнниттэн 50% диэри сууманы тутан ылыахтарын син. Харчыҥ суох эбэтэр тиийбэт буоллаҕына, бириистэптэр баайы-дуолу былдьыахтарын сөп. Ол гынан баран барытын ылбаттар: холодильнигы, оһоҕу, таҥаһы-сабы, олоххо наадалаах тэрили хаалларыахтара. Ол эрэн тэлэбиисэри, иккис көмпүүтэри эбэтэр массыынаны былдьыахтарын сөп», – диэн эксперт бэлиэтиир.

Ону таһынан, бириистэптэр бааҥҥа сытар счеттаргын былдьыыр бырааптаахтар, манна сүрүн иэскэр суут ороскуоттара эбиллиэхтэрэ, бу төлөнөр сууманы өссө улаатыннарыахтара диэн Бондарь бэлиэтээтэ. Ону таһынан, иэс 30 000 солкуобайтан таҕыстаҕына, элбэхтик айанныыр эбэтэр командировкаҕа барар буоллаххына, тас дойдуга айанныырга кыһалҕа үөскүөҕэ.

Ол гынан, соҕотох дьиэҥ иэс иһин былдьаныа суоҕа. Холобур, ипотека иһин иэс буолбатаҕына.

Оттон кыбартыыра кирэдьиитинэн атыылаһыллыбыт уонна бааҥҥа солуок быһыытынан турар, онуоха элбэх иэстээх буоллаххына, баан суут нөҥүө ону былдьыан сөп.

Хомунаалынай төлөбүрү ким баҕарар хойутаан төлүөн сөп. Онон хомунаалынай хаһаайыстыбалар иэстээх дьонтон харчыны хайдах хомуйалларын, иэскин хайдах төлүүргүн уонна туох бырааптааххын билэриҥ наада.