“Holbon” бэстибээл саҥа тыыннанар

Быйылгы тэрээһин саҥа тыыннанан, уопсайа 48 тыыннаах музыканы толорор олохтоох бөлөхтөрү түмэ тардыаҕа диэн тэрийээччилэр иһитиннэрэллэр. Бөлөхтөр чэпчэки инди жанрыттан ыарахан рокка тиийэ оонньуохтара.

Маны таһынан 12 саҥа тэриллибит рок бөлөх улахан сыанаҕа аан бастаан тахсыахтара. Бэстибээл бырагыраамата үс күҥҥэ хайытыллыбыт, хас биирдии күнүгэр Саха сирин тыыннаах номохторо буолбут артыыстар, бөлөхтөр ыллыахтара.

Бээтинсэҕэ билигин аатырар “Kuturar” бөлөх, субуотаҕа – 90-с сыллар сулустара “Байанай” бөлөх, өрөбүлгэ “Дапсы” бөлөх сыанаҕа тахсыахтара.

“Дапсы” бөлөх төрүттээччитэ Иннокентий Гаврильев-Лэкиэс биһиги кэккэбититтэн туораабытын кэннэ кини тэрийбит бөлөҕө салгыы айар-тутар суолу талбыт. Лэкиэс партияларын төрөппүт уолаттара Роберт уонна Эллэй толоруохтара, ону тэҥэ “Дапсы” бастакы солиһа Байбал Сэмэнэп кыттыаҕа. Маны таһынан, бэстибээл үһүс күнүгэр Клавдия уонна Герман Хатылаевтар ыллыахтара.