ХИФУ устудьуоннара норуоттар икки ардыларынааҕы кэмпириэнсийэҕэ

Новосибирскайга ыытыллыбыт устудьуоннар норуоттар икки ардыларынааҕы кэмпириэнсийэлэригэр М.К. Аммосов аатынан ХИФУ 40 устудьуона чинчийэр үлэтинэн кыттыбытыттан 10-на бириистээх миэстэҕэ тигистэ, икки үлэ бэчээттэнэргэ рекомендацияны ылла. Бу туһунан ХИФУ пресс-сулууспата суруйда.

Сибииргэ ыытыллар ыччат биир улахан тэрээһининэн биллэр кэмпириэнсийэҕэ сыллата 3 тыһ. кэриҥэ устудьуон кыттар. Быйылгы кэмпириэнсийэҕэ 47 сиэксийэ үлэлээтэ. ХИФУ устудьуоннара «Этнография» хайысхаҕа үгүс үлэнэн кытыннылар. Бу былаһааккаҕа ХИФУ историяҕа факультетын кафедратын доцена Капитолина Яковлева эксперт  быһыытынан үлэлээтэ. «Биһиги сиэксийэбитигэр дойду араас регионуттан уопсайа 55 устудьуон уонна 70-тан тахса оскуола оҕото кытынна. Классическай этнографияттан саҕалаан, социальнай антропологияҕа тиийэ араас тиэмэнэн үлэлэри көрдүбүт. Биһиги университеппытыттан  улахан хамаанда тиийэн кытынна – 9 устудьуон уонна «Сириус. Лето: начни свой проект» бырагыраама чэрчитинэн устудьуон настаабынньыктаах 3 оскуола үөрэнээччитэ бырайыактарын көрдөрдүлэр. Ону сэргэ быйыл биһиги оҕолорбут бастакытын этнографияҕа цифровизацияны киллэриигэ дакылааттары аахтылар», – диэн Капитолина Яковлева санаатын үллэһиннэ.

Анастасия Петрова, «Историко-культурное наследие: гипермедиа технологии» хайысхаҕа бастакы сылын үөрэнэр магистрант, этнография чинчийиилэригэр 3D-сканердааһын ньыматын туһаныыны ХИФУ археологияҕа уонна этнографияҕа түмэлин холобуругар көрдөрөн кэпсээтэ. Экспердэр, бу аныгы кэм ньымата чинчийээччигэ үлэ үөһүгэр сылдьан тута сканердыыр кыаҕы биэрэр буолан, үлэни биллэ чэпчэтэрин бэлиэтээтилэр.

Оттон ХИФУ историяҕа факультетын 3-с кууруһун устудьуона Валерия Алексеева Ыһыах түһүлгэтин сакральнай тутууларын чинчийбит үлэтинэн  иккис миэстэни ылары ситистэ. «Кэмпириэнсийэ баай ис хоһоонноох буолла: маастар кылаастарга, төгүрүк остуолларга, экскурсияларга, оннооҕор Татарстан өрөспүүбүлүкэтин кэнсиэригэр сырыттыбыт. Биһиги сиэксийэбит СО РАН археологияҕа уонна этнографияҕа институтугар үлэлээбитэ үөртэ. Олус элбэх интэриэһинэй дакылааты иһиттим, экспердэр олус үчүгэй атаарар алгыс тылы эттилэр уонна рекомендациялары биэрдилэр», – диэн Валерия санаатын үллэһиннэ.

ХИФУ Пединстиутун 3-с кууруһун устудьуона Валерия Колесова «soft skills» оскуола оҕотун профориентациятыгар дьайыытын чинчийбитин билиһиннэрдэ. Кини бу бырайыагын балаҕан ыйыттан саҕалаабыт, инникитин кэҥэтэр, дириҥэтэр былааннаах.

Кэмпириэнсийэ языкознание «Семантика» подсекциятыгар 3-с миэстэни ылбыт ХИФУ филологияҕа факультетын устудьуона Яна Капитонова Владимир Тан-Богораз «Союз молодых» арамааныгар Арктика төрүт олохтооҕо нууччалар диалект тылларын туттубут уратытын чинчийбит үлэтинэн кытынна. Кини: «Араас регионтан элбэх интэриэһинэй дакылааттары иһиттим. Экспердэр компетентнайдар уонна үтүө сыһыаннаахтар ­ – ол олус үөртэ. Билим эйгэтигэр үүнэргэ-сайдарга олус элбэх туһалаах информацияны ыллым, бу тэрээһин сорҕото буолбуппуттан үөрэбин», – диэн санаатын үллэһиннэ.

Хаартыска: ХИФУ саайтыттан