ХИФУ аспирана Уһук Илинтэн соҕотох РФ Бэрэсидьиэнин стипендиата буолла

Кини Уһук Илинтэн уонна федеральнай университеттартан бу стипендияҕа тиксибит соҕотох киһинэн буолла.

Нина Турантаева ХИФУ аспирантуратыгар «Теоретическая, прикладная и сравнительно-сопоставительная лингвистика» диэн идэҕэ үөрэнэр, «Лингвистическая экология Арктики» научнай-чинчийэр лаборатория эдэр чинчийээччитэ буолар. Диссертациятын «Монголизмы в якутском языке: названия животных и термины животноводства» диэн тиэмэҕэ суруйар, салайааччыта – филологическай наука доктора Нинель Малышева.

Нина Турантаева бу иккис улахан стипендияҕа тиксиитэ эбит. Бу иннинэ кини 2024 сыллаахха  аспираннар уонна адъюнктар Бэрэсидьиэн стипендиятын иһин күрэстэһиилэригэр бастыы сылдьыбыт. Онно 4,7 тыһ. сайаапка киирбититтэн 500 эдэр учуонай биһирэммиттэр.  

Тас дойдуга үөрэнэ барыыта Нина научнай чинчийиитин салгыы ыытарыгар тирэх буолуоҕа.