Хайаан да эргиллээр...

Хайаан да эргиллээр...

Быраһаай диибин дуо, доҕоруом,

Баҕарбат сүрэҕим ол тылы этиэҕин.

Ыар баттык санаалар сордууллар,

Дууһаны тыыннаахтыы сулуйан,

Барыбыт салгынын тууйаллар,

Барыбыт сүрэҕин аймыыллар.

Саныыр санаабыт барыта эйиэхэ,

Сураххын кэтиибит, күүтэбит эрэнэ,

Тыыннаах бу илэ киирэн кэлэҥҥин,

Ыар таһаҕас да буолан тиэллэҥҥин

Эргиллээр, хайаан да доҕоруом...

Оо, оҕобун даа

Уолчааным – Буойунум

Сылаас, хорсун сүрэҕиҥ

Тибийэ тэбэрэ тохтоотоҕо.

Оҕом сыыһа, ыраах сиргэ

Тоҥ өлүк буолан сыттаҕыҥ.

Оо, кыахтаах буолларбын,

Хараҕым ууларын киэр илгэн,

Илэ бэйэбинэн тиийэммин,

Ол аад айаҕар сиик буолан

Симэлийэ сүтүөҥ иннинэ,

Эт илиибинэн көтөҕөн ылан

Сүрэхпэр сыһыары туттарбыан.

Оо, ол иэдээннээх дойду

Умайар уот кутаатыттан

Хара күүспүнэн былдьаан ылан,

Куйах көхсүбүнэн хаххалаан,

Ыһыктыбаттыы ыга кууһан,

Куоттаран илдьэ кэллэрбиэн

Сыллаан, уураан ылларбыан,

Уҥуоххун тутан уоскуйдарбыан.

Оо, оҕом сыыһа даа,

Үрдүк Айыыларым көмөлөһүҥ.

Кэтэһимэ, мин суохпун...

Аҕам, Аҕаккаам,

Суохтаан сору көрдөҕүҥ,

Суохпун, Аҕаа, бырастыы,

Кэтэһимэ, мин суохпун.

Ахтылҕаннаах дьиэбэр аны

Илэ киирэн кэлбэппин,

Алыс ахтыбыппын биллэрэн

Ыга кууһан ылбаппын.

Сэрии уордаах кутаатыттан

Тыыннаах ордон тахсыбатым,

Санаам тиийбэт дойдутугар

Бойобуой суолбун түмүктээтим.

Түүнүн утуйбакка,

Күнүһүн түннүгү одуулаһан,

Кэтэһимэ, Аҕаа,

Мин суохпун...

Көрүүй, үөһэ халлааҥҥа,

Сырдык сулус тыгарын,

Ити мин, Аҕаа, мин баарбын,

Аны киэҥ халлаан уолабын.

Тохтон бүппэт көмүскэҥ уута,

Ааспат-арахпат аһыыҥ-абаҥ,

Буойун уолуҥ – Эн киэн туттууҥ,

Барыгыт сүрэҕэр тыыннаахпын!

Бойобуой суоллара сотуллубат

Эн олор, Ийээ, уһуннуук-уһуннук,

Оҕоҕун саныырыҥ тухары,

Кинини өлбөт үйэлиир туһугар.

Олор, күүстээх санааны ылынан,

Өйгүн-санааҕын чөл тутаҥҥын,

Олор, оҕолоруҥ, сиэннэриҥ туһугар,

Хаххалара, махталлара буолаҥҥын.

Күнү түүн солбуйан күн-дьыл ааһар,

Ол курдук күннээх олохпут салҕанар.

Буойуттар – уолаттар тыыннаахтар!

Бойобуой суоллара сотуллубат!

Күндү мөссүөннэрэ умнуллубат!