Хайа эрэ өттүнэн барыбытыгар сыһыаннаах сокуон

289 нүөмэрдээх “Платформеннай экэниэмикэ туһунан” федеральнай сокуон күүһүгэр киириитин күһүҥҥү кэм тутаах түгэнинэн ааттыыллар.

Бу сокуону Wildberries, Ozon, «Яндекс», «Авито» курдук кэнники кэмҥэ олус киэҥник туттуллар сыыппара платформаларын кытта атыыһыттар уонна толорооччулар алтыһыыларын бэрээдэктиир аан бастакы докумуон дииллэр эбит.

Бу саҥа сокуон онлайн-атыы уонна өҥө ырыынагар быраабыланы олохтуур, атыы-тутуу, өҥө оҥоһуллуута өйдөнүмтүө, аһаҕас уонна сиэрдээх буолуутун хааччыйар сыаллаах.

Туох хайа иннинэ маркетплейсы туһанан, табаар, бородууксуйа атыылааччыларга олус суолталаах уларыйыылары киллэрбит. Холобур, сыыппара платформата атыыһыттан  көҥүлэ суох  кини табаарыгар аахсыйа биллэрэр эбэтэр быдан чэпчэки сыанаҕа атыылыыр (распродажа) бырааба тохтуур.  Ону ааһан, “итинник тэрээһиннэргэ кыттыбаккын” диэн матыыптаан атыыһыт эриэйтинин түһэрэр, ыстырааптыыр бырааба быһыллар

Саҥа сокуоҥҥа олоҕуран, платформалар үлэлиир алгоритмнарын бириинсибин – табаары хайдах быһыылаахтык, туох киритиэрийдэргэ олоҕуран көстүүлээх сиргэ биитэр кэнники миэстэҕэ туруоралларын, эриэйтини хайдах оҥороллорун – атыыһыкка хайаан да быһааран биэрэр эбээһинэстэнэллэр.

Платформа атыылааччыттан тутар хамыыһыйатын үрдэтэргэ суоттанар түгэнигэр ол быһаарыытын олоххо киллэриэ, кырата,  45 күн иннинэ  атыыһыкка булгуччу биллэриэхтээх.  Оччотугар атыыһыт анал тиһик нөҥүө алгоритм үрдэтэр быһаарыытыгар сөпсөспөт, утарсар кыахтанар. Ол сөбүлэспэтин туһунан биллэрбитин кэннэ платформа киниэхэ хайаан да 15 күн иһигэр хардарыахтаах.

Көрдөххө, олус сөптөөх ирдэбиллэр. Онон бу сокуон иннинэ маркетплейстар, агрегатордар олус да күннээн-күөнэхтээн олорбуттар, атыыһыт барахсан бырааба быыкаа да  эбит диэн бигэ санаа үөскүүр.   

Ону тэҥэ маркетплейстартан атыылаһааччыларга сыһыаннаах өссө биир үтүө сонун баар.

Мантан инньэ платформа хаачыстыбатыгар эппиэттэһэрин туһунан сэртипикээтэ уонна декларацията суох табаарга карточка оҥорон, атыыга таһаарар кыаҕа суох буолар.

Ол эбэтэр, хаачыстыбата суох, сэрэхтээх, кутталлаах табаарга түбэһэр кутталбыт кыччыыр эбит. Маркетплейстары туһаныы кэҥээтэр-кэҥиир чинчилээх. Саха сиригэр, холобур, Валдбериз ыскылаата түстэниэхтээх диэн сонун баара. Онон өрөспүүбүлүкэ олохтоохторо атыыһыт, атыылаһааччы да быһыытынан ити платформаҕа күүскэ үлэлэһэрбит чахчы.

Ол иннинэ бу туһааннаах ырыынагы, платформаны бэрээдэктиир сокуон киирбитэ олус үчүгэй.

Утум-ситим уларыйыы

Өскөтүн табаар сыыппара платформатын нөҥүө атыылаһыллыбыт табаарга итэҕэс-быһаҕас (недостаток) баар түгэнигэр атыыласпыт киһи атыыһыкка ирдэбил түһэрэр бырааптанар. Атыылаһааччы ол быраабын сатаан туһанарын курдук техническэй кыаҕы платформа эпэрээтэрэ хааччыйыахтаах.  Төлөммүт харчыбын төннөрүҥ диэн ирдэбил турар буоллаҕына, эпэрээтэр атыыласпыт киһиэхэ платформа нөҥүө төлөммүт суумма төннөрүн эмиэ хааччыйыахтаах. Ону тэҥэ төннөрүллүбүт табаар платформа логистикалыыр инфраструктуратын нөҥүө ыытыллыбыт түгэнигэр, атыыһыкка ол табаар төннөрүн эмиэ хааччыйар буолар.