Хатаска икки улахан эбийиэк үлэҕэ киириэҕэ

Баһылык Евгений Григорьев куорат тэрийэн үлэлэтэр Хатастааҕы «Баҕарах» хаһаайыстыба үлэтин билистэ, саҥа тутуллар икки бөдөҥ тыа хаһаайыстыбатын эбийиэгин көрдө-иһиттэ. 

«Баҕарахха» быйыл сайын тыа хаһаайыстыбатын министиэристибэтин өйөбүлүнэн икки бөдөҥ эбийиэк тутуллар – убойнай сыах уонна от харайар ангаардар. 

Убойнай сыаҕы тутуу быйыл ыам ыйыттан саҕаламмыт. Куорат баһылыга Евгений Григорьев бэлиэтээбитинэн, Дьокуускай куоракка бу бастакы убойнай сыах. Сыах симиэнэҕэ уон сүөһүнү астыыр кыамталаах уонна сыах өҥөтүнэн «Баҕараҕы» таһынан ким баҕалаах туһаныан сөп.
От харайар тутуу бастакы түһүмэҕэ 2024 сыл бүтүүтэ саҕаламмыт. Бүгүҥҥү күҥҥэ 5 тыһыынча туонна оту харайарга аналлаах 5 ангаартан иккитэ түмүктэммит.
Эбийиэктэр иккиэн аны күһүн Тыа хаһаайыстыбатын үлэһитин күнүн көрсө үлэҕэ киириэхтээхтэр. 

Баһылык маны сэргэ «баҕарахтар» оттуур Хороҕор арыыларыгар тахса сырытта. Сэттэ киһилээх уонна алта тыраахтырдаах механизированнай звено биир тыһыынча туонна оту бэлэмниир былааннаах. Тэрилтэ уопсайа 700 сүөһүтүгэр балтараа тыһыынча кэриҥэ туонна от наада. 

Оттон куорат бары бааһынай хаһаайыстыбалара быйыл сайын 8 тыһ. туоннаттан тахса оту бэлэмниэхтээхтэр, диэн Олохтоох дьаһалта пресс-сулууспата иһитиннэрэр.