Хатас уонна Тулагы оскуолалара Арассыыйаҕа үрдүк ситиһиилэннилэр

П.Н. уонна Н.Е. Самсоновтар ааттарынан Хатас орто оскуолата уонна П.И. Кочнев аатынан Тулагы орто оскуолата оҥорон таһаарар бородууксуйалара Бүтүн Арассыыйатааҕы «Золотая осень-2025» агробырамыысаланнай быыстапкаҕа үрдүк сыанабылы ылла. Бу үөрүүлээх сонуну Дьокуускай куорат Үөрэххэ управлениета иһитиннэрдэ.   

Ол курдук, Хатас орто оскуолатын (дириэктэр Слепцов Н.В.) уонна Тулагы орто оскуолатын (дириэктэр Дьяконов Н.В.) учууталлара уонна үөрэнээччилэрэ «Производство высококачественной пищевой продукции» диэн Бүтүн Арассыыйатааҕы күрэххэ 7 мэтээлинэн наҕараадаланнылар.

Хатас оскуолатын бородууксуйалара бу курдук ситиһиилэннилэр: моонньоҕонтон утах – кыһыл көмүс мэтээл; аһы тупсарар тумалаах туус – кыһыл көмүс мэтээл; бакыаттаах уомултан миин – кыһыл көмүс мэтээл; «Бриллианты Севера» дьэҥкир кэмпиэттэрэ – үрүҥ көмүс мэтээл; шашлыгы кытта сииргэ кэнсиэрбэлэммит оҕурсу – үрүҥ көмүс мэтээл.

Тулагы оскуолата оҥорон таһаарар икки бородууксуйата – бэйэтин симэһинигэр буспут ынах этэ уонна эмиэ итинник ньыманан буспут сибиинньэ этэ кыһыл көмүс мэтээлинэн бэлиэтэннэ.  

Маны таһынан үөрэнээччилэргэ аналлаах үөрэх бырагырааматыгар биһиги оҕолорбут Саха сирин дэлэгээссийэтин кытта бырайыактарын көмүскээтилэр, киэҥ сэҥээриини ыллылар. Ону сэргэ оҕолор К.А. Тимирязев аатынан Москватааҕы тыа хаһаайыстыбатын академиятын түмэлигэр, Ленин аатынан сопхуос киэҥ нэлэмэн хонууларыгар, саадтарыгар сырыттылар, элбэҕи биллилэр-көрдүлэр.

Дьокуускай куорат тыа хаһаайыстыбатын сарсыҥҥытын салайсар агро хайысхалаах оскуолаларынан киэн туттар!