Хатас почтатын дьиэтэ өрөмүөннэнэр буолла  

“Киин куорат” хаһыат 2025 муус устар ыйыгар «Сытыы муннук» рубриканан «Хаарбах, тымныы почта дьиэлэрэ…билиҥҥи кэмҥэ бааллар дуо?» диэн ыстатыйаны таһаарбыта.

Ол курдук, 2025 с. муус устар 24 күнүгэр диэри РФ Бэрэсидьиэнин сорудаҕынан хаарбах туруктаах почта дьиэлэрин модернизациялыырга туһуламмыт бырайыак иитинэн Госуслуги портал нөҥүө куоластааһын ыытыллыбыта. Биир киһи биир отделениеҕа куоластыыр кыахтааҕа.

Бу нэдиэлэҕэ ыстатыйаҕа суруллубут Хатас почтатын начаалынньыга «Киин куорат» эрэдээксийэтигэр үөрүүтүн үллэһиннэ.

Метта Николаевна Иванова, Хатастааҕы почта отделениетын начаалынньыга:

– Кыһыҥҥы улахан тымныыларга почтабыт сабылларга тиийэр усулуобуйалаах үлэлээн кэллибит. Арай бу кыһын ахсынньы ыйга: «Өрөмүөҥҥэ барар буоллугут!» – диэн үөрүүлээх сонуну туттубут. Бэдэрээтчит кытта билиннэ. Дьиҥэр, саҥа дьиэҕэ баҕарар этибит да буоллар, ис-тас өттө бүтүннүүтэ өрөмүөннэнэр буолбута үчүгэй. Маны таһынан пандус тутуллар буолла.

Онон биһиги кыһалҕабытын киэҥ эйгэҕэ таһаарбыт, дьоҥҥо-сэргэҕэ тиэрдибит «Киин куоракка», Арассыыйа почтатын салалтатыгар, Олохтоох дьаһалтаҕа сурук суруйан, сүүрэн-көтөн туруорсубут Хатас ытык кырдьаҕаһа Василий Иннокентьевич Сорокоумовка махтанабыт.

Ити курдук Арассыыйа почтатын отделениеларын өрөмүөннүүргэ бырайыак олоххо киирэн эрэриттэн сэмээр үөрэбит.